मुंबई महानगर प्रदेशातील (एमएमआर) रखडलेल्या झोपडपट्टी पुनर्विकास प्रकल्पाला गती देण्यासाठी मंगळवारी मुख्यमंत्री एकनाथ शिंदे यांच्या अध्यक्षतेखाली बैठक झाली. यावेळी, मुंबई महानगर प्रदेश विकास प्राधिकरण (MMRDA) आणि झोपडपट्टी पुनर्वसन प्राधिकरण (SRA) यांच्यात माता रमाबाई आंबेडकर नगर आणि कामराज नगरमधील अंदाजे 15,000 घरांच्या पुनर्विकासासाठी संयुक्त करार करण्यात आला. मंत्रालयात झालेल्या एमएमआरडीएच्या बैठकीत ही संमती देण्यात आली.
यासोबतच मुख्यमंत्र्यांनी इतर महत्त्वाच्या पायाभूत सुविधांच्या प्रकल्पांना गती देण्यास सांगितले आहे, ज्यामध्ये वांद्रे कुर्ला संकुलातील ऑटोमेटेड रॅपिड पब्लिक ट्रान्सपोर्ट (पॉड टॅक्सी) प्रकल्प (मुंबईतील पॉड टॅक्सी) या प्रकल्पालाही मंजुरी देण्यात आली आहे. याशिवाय एमएमआरडीएलाही स्वच्छता मोहीम राबवण्याच्या सूचना देण्यात आल्या आहेत.
पॉड टॅक्सीने वांद्रे स्टेशन ते बीकेसी हा प्रवास सोपा होणार
पॉड टॅक्सी वांद्रे कुर्ला कॉम्प्लेक्स (BKC) येथून वांद्रे आणि कुर्ला स्थानकादरम्यान चालेल आणि तिचे अंतर 8.80 किमी आहे. यात 38 स्थानके असतील. त्याची क्षमता प्रति पॉड सहा प्रवासी आहे. त्याचा कमाल वेग ताशी 40 किमी असेल. मंगळवारी झालेल्या बैठकीत हा प्रकल्प सार्वजनिक खासगी भागीदारी तत्त्वावर सुरू करण्यास मुख्यमंत्र्यांनी मान्यता दिली आहे. विशेष म्हणजे या प्रकल्पामुळे वांद्रे स्थानक ते बीकेसी हा प्रवास सुकर होण्यास मदत होणार आहे.
पुनर्विकास संयुक्त भागीदारी तत्त्वावर
मुंबईतील रखडलेल्या झोपडपट्टी पुनर्विकास प्रकल्पाला गती देण्यासाठी BMC, ठाणे महापालिका, MMRDA, CIDCO आणि म्हाडा यांच्यामार्फत संयुक्त भागीदारी तत्त्वावर पुनर्विकास केला जाईल. याअंतर्गत एसआरए आणि एमएमआरडीएच्या माध्यमातून माता रमाबाई आंबेडकर नगर आणि कामराज नगरमध्ये 15 हजार घरांचा पुनर्विकास करण्यात येणार आहे.
ईस्टर्न फ्रीवे आणि वेस्टर्न एक्स्प्रेस वे दरम्यान असलेल्या सुमारे 2000 झोपडपट्ट्यांच्या पुनर्विकासाचाही या प्रकल्पात समावेश असेल, ज्यामुळे मार्ग मोकळा होण्यास मदत होईल.
ठाणे झोपडपट्टीमुक्त होणार
ठाणे महानगरपालिका क्षेत्रातील ठाणे परिवहन सेवेच्या मालकीच्या जागेवर आधुनिक बस डेपो विकसित करण्यासाठी प्राधिकरणाच्या माध्यमातून झोपडपट्ट्यांचे पुनर्वसन जवळपासच्या शासकीय जमिनीवर केले जाणार आहे. त्यासाठी मोफत सरकारी जमीन उपलब्ध करून दिली जाणार आहे. यामुळे झोपडपट्ट्यांचे पुनर्वसन होऊन ठाणे शहर झोपडपट्टीमुक्त करण्याच्या प्रयत्नांना चालना मिळेल, असे मुख्यमंत्री म्हणाले.
अनेक द्रुतगती मार्गांना मंजुरी
बैठकीत ठाणे खाडी किनारी मार्गावरील वाळकुम ते गायमुख (ठाणे कोस्टल रोड), पूर्व द्रुतगती मार्गावरील ठाणे शहरातील छेडा नगर, घाटकोपर ते ठाणे आणि आनंद नगर ते साकेत या पूर्व मुक्त मार्ग विस्तार प्रकल्पाच्या कामावर चर्चा करण्यात आली.
तसेच विस्तारित मुंबई नागरी पायाभूत सुविधा प्रकल्पांतर्गत कासारवडवली ठाणे ते खारबाव भिवंडी प्रकल्प, ऐरोली बोगदा ते काटई नाका, गायमुख ते पायेगाव दरम्यानचा खाडी पूल, कल्याण बायपास विभाग 8 (रुंदे रोड ते गोवेली रोड) या विस्तारित मुंबई नागरी पायाभूत सुविधा प्रकल्पाच्या (विस्तारित एमयूआयपी) बांधकामास प्रशासकीय मान्यता देण्यात आली.
यावेळी एमएमआरडीएमार्फत स्पेशल पर्पज व्हेईकल (एसपीव्ही) कंपनी स्थापन करण्यास मान्यता देण्यात आली. याशिवाय कन्सल्टन्सीची कामे करण्यास आणि व्यवसाय विकास कक्षाची स्थापना करण्यासही मान्यता देण्यात आली.
हेही वाचा
Share
Tweet
