मुंबईकरांच्या खिशाला कात्री लागण्याची शक्यता आहे. मागील ५ वर्षांपासून न मिळालेली भाडेवाढ आणि कोरोनामुळं बसलेल्या आर्थिक फटक्यामुळं परिवहन विभागानं काळ्या-पिवळ्या रिक्षासाठी किमान २ रुपये, तर टॅक्सीसाठी ३ रुपये भाडेवाढ प्रस्तावित केली आहे. या भाडेवाढीबाबात मंगळवारी चर्चा होण्याची शक्यता आहे. मुंबई महानगर प्रदेश परिवहन प्राधिकरणाऱ्या बैठकीत याबाबत चर्चा होण्याची शक्यता आहे.
रिक्षा-टॅक्सी भाडेवाढीसाठी खटुआ समितीचे सूत्र वापरले जाणार आहे. या समितीच्या शिफारशी शासनानं स्वीकारल्यानं त्यातील भाडेदरासंदर्भात शिफारशींवरही होणाऱ्या बैठकीतही चर्चा केली जाणार आहे. शिफारशींमध्ये टॅक्सीसाठी सवलतींचे ८ टप्पे, तर रिक्षासाठी ४ टप्पे, काळ्या-पिवळ्या टॅक्सी सेवेत ८ किलोमीटरच्या पुढील टप्प्यासाठी १५ ते २० टक्के सवलत, भाडेदर दोन पटींपर्यंतच वाढवण्याची मुभा, मुंबई महानगर क्षेत्रात मध्यरात्री १२ ते पहाटे ५ पर्यंत रिक्षा-टॅक्सीला भाडेवाढ नाही इत्यादींचा यात समावेश असणार आहे.
रिक्षा-टॅक्सीच्या भाडेवाढीसंदर्भात २२ डिसेंबरला परिवहन प्राधिकरणाच्या बैठकीत चर्चा होणार असून समितीकडून याबाबत अंतिम निर्णय घेतला जाणार असल्याचं परिवहन आयुक्त अविनाश ढाकणे यांनी म्हटलं. याआधी रिक्षा-टॅक्सी भाडेवाढ प्रत्येक वर्षी जूनमध्ये सरकारनं नेमलेल्या हकीम समितीच्या सूत्रानुसार होत होती.
सध्या काळ्या-पिवळ्या रिक्षाचं किमान भाडं १८ रुपये, तर टॅक्सीचं २२ रुपये भाडं आहे. रिक्षाच्या भाडेदरात २ रुपये आणि टॅक्सीच्या भाडेदरात ३ रुपयांची वाढ प्रस्तावित केली आहे. त्यामुळं रिक्षाचं भाडं २० रुपये आणि टॅक्सीचं भाडे २५ रुपये होणार आहे. याबाबतचा अंतिम निर्णय मात्र प्राधिकरणाच्या बैठकीत होणार आहे.
Share
Tweet
