मध्य रेल्वे मार्गावर मंगळवारी रात्री ऐन गर्दीच्या वेळेस लोकल ट्रेनमधून पडून एका प्रवाशाचा मृत्यू तर दोन प्रवासी जखमी झाल्याची घटना घडली आहे. जखमींना तातडीने उपचरांसाठी रुग्णालयात दाखल करण्यात आलं आहे.
मध्य रेल्वेच्या कुर्ला आणि सायन अशा दोन स्थानकांदरम्यान ही घटना घडली आहे. ही लोकल रात्री साडेनऊच्या सुमारास कुर्ला ते सायन स्थानकादरम्यान असताना गर्दीच्या रेट्यामुळे तीन प्रवासी खाली पडले.
ही घटना घडल्यावर जीआरपी कंट्रोल रुमला या अपघाताबाबतचा फोन आला. त्यानंतर हमालांनी या तिघांना उचलून घाटकोपरच्या राजावाडी रुग्णालयात दाखल केलं. तिथं एका प्रवाशाला डाॅक्टरांनी मृत घोषित केलं. तर इतर दोन जखमी प्रवाशांना नंतर सायन रुग्णालयात हलवण्यात आलं. जखमी प्रवाशांची नावे अद्याप कळू शकलेली नाही.