मुंबई महापालिकेच्या शिक्षण विभागाचा सन २०१८-१९चा अर्थसंकल्प अतिरिक्त आयुक्त आबासाहेब जऱ्हाड यांनी शिक्षण समिती अध्यक्षा शुभदा गुढेकर यांना सादर केला. तब्बल २५६९.३५ कोटींचा अर्थसंकल्प मांडण्यात आला आहे. मागील वेळेस शिक्षण विभागाचा २३११.६६ कोटींचा अर्थसंकल्प मांडण्यात आला होता. या अर्थसंकल्पात विद्यमान योजनाच पुढे घेऊन जाण्याचा संकल्प करत निधीची तरतूद करण्यात आली आहे. सोबतच बंद पडलेल्या ३५ शाळा लोकसहभागातून चालवण्याचा संकल्प करत महापालिकेने शाळांची खासगीकरणाकडे वाटचाल करण्याचे स्पष्ट संकेत दिले.
मुंबई महापालिकेच्या सर्व शाळांमध्ये सीसीटीव्ही कॅमेरे बसवण्याची घोषणा महापालिकेच्या शिक्षण विभागाच्या अर्थसंकल्पात करण्यात आली आहे. त्यानुसार ३८१ शाळांमध्ये एकूण ४,०६४ सीसीटीव्ही कॅमेरे बसण्यात येणार आहेत. याशिवाय २४ आंतरराष्ट्रीय शाळा बांधणे आणि मुलांना फुटबॉल प्रशिक्षण देण्याचीही घोषणा करण्यात आली आहे.
महापलिकेच्या माध्यमिक शाळेतील इयत्ता ८ वी ते १० वी च्या विद्यार्थिनींकरता १५९ शालेय इमारतीमध्ये १७२ सॅनिटरी नॅपकिन व्हेंडिंग मशिन आणि सॅनिटरी बर्निंग मशिन बसवण्यात आलेल्या आहेत. आता आगामी वर्षात इयत्ता ६ ते ८ वी च्या मुलींसाठी ३४५ इमारतींमध्ये ३८१ सॅनिटरी नॅपकिन व्हेंडिंग मशिन बसवण्यात येणार आहेत.
महापालिका शालेय विद्यार्थ्यांचे लेखन कौशल्य प्रभावी होणं ही काळाची गरज असल्याने अक्षरशिल्प प्रकल्प राबवण्यात येणार आहे. यामध्ये विद्यार्थ्यांचं लेखन सुवाच्य व वळणदार व्हावं यासाठी विद्यार्थ्यांना सुलेखन वही, अक्षरखच पाटी, चार रेघी वह्या देण्यात येणार आहेत. याद्वारे विद्यार्थ्यांच्या हस्ताक्षरात सुधारणा होईल.
शिक्षण समितीची अर्थसंकल्प बैठक १२ वाजता आयोजित करण्यात आली होती. पण १२.२० वाजेपर्यंत भाजपाच्या आरती पुगावकर, सेनेच्या शीतल म्हात्रे, स्नेहल आंबेकर हे तीनच सदस्य हजर होते. त्यानंतर इतर सदस्य आल्यानंतर १२.२६ ला अध्यक्षा शुभदा गुढेकर उपस्थित राहिल्या.
Share
Tweet
