मुंबईतील माऊंट मेरी यात्रेदरम्यान होणारी गर्दी लक्षात घेऊन बृहन्मुंबई विद्युत पुरवठा आणि परिवहन अर्थात BESTकडून विशेष बस व्यवस्था करण्यात आली आहे. 13 ते 20 सप्टेंबरदरम्यान वांद्रे फेअरच्या काळात एकूण 236 अतिरिक्त बसफेऱ्या चालवण्यात येणार आहेत.

माऊंट मेरी चर्चमध्ये होणाऱ्या वार्षिक उत्सवासाठी मोठ्या संख्येने भाविक आणि पर्यटक वांद्रे येथे येतात. उपनगरीय रेल्वेने बांद्रा पश्चिम स्थानकात उतरल्यानंतर अनेक प्रवासी BEST बसने उत्सवस्थळी जातात. त्यामुळे या काळात प्रवाशांची वाढणारी गर्दी लक्षात घेऊन अतिरिक्त बसफेऱ्यांची व्यवस्था करण्यात आली आहे.

मात्र, माऊंट मेरी चर्च आणि फादर अॅग्नेल आश्रम परिसरात मोठी गर्दी अपेक्षित असल्याने बस थेट चर्चपर्यंत जाणार नाहीत. या अतिरिक्त बस वांद्रे रेल्वे स्थानक (पश्चिम) ते हिल रोड गार्डनदरम्यान चालवल्या जाणार असून, तेथून भाविकांना चर्चपर्यंत पायी जावे लागणार आहे.

BESTकडून वांद्रे पश्चिम रेल्वे स्थानकासह महत्त्वाच्या ठिकाणी बस निरीक्षक आणि वाहतूक अधिकाऱ्यांचीही नियुक्ती करण्यात आली आहे. हे कर्मचारी प्रवाशांना मार्गदर्शन करणे, बससेवेचे नियमन करणे आणि गर्दीच्या पार्श्वभूमीवर वाहतूक व्यवस्था सुरळीत ठेवण्याचे काम करणार आहेत.

13 आणि 19 सप्टेंबरला अधिक बस फेऱ्या

13 आणि 19 सप्टेंबर रोजी सकाळी 10 आणि सायंकाळी 10 अशा एकूण 20 अतिरिक्त बसफेऱ्या पाच मार्गांवर चालवल्या जाणार आहेत.

हे मार्ग पुढीलप्रमाणे आहेत :

• मार्ग A-202 : माहिम बस स्थानक ते गोराई डेपो – प्रत्येकी दोन बस

• मार्ग 321 लिमिटेड : माहिम बस स्थानक ते बारवे नगर – प्रत्येकी दोन बस

• मार्ग A-375 : बांद्रा पश्चिम बस स्थानक ते शिवाजीनगर डेपो – प्रत्येकी दोन बस

• मार्ग A-422 : बांद्रा पश्चिम बस स्थानक ते विक्रोळी डेपो – प्रत्येकी दोन बस

• मार्ग A-C 71 : धारावी डेपो ते मीरा रोड रेल्वे स्थानक (पूर्व) – प्रत्येकी दोन बस

या दिवशी सकाळची सेवा सकाळी 8 ते दुपारी 4 वाजेपर्यंत, तर सायंकाळची सेवा दुपारी 3 ते मध्यरात्री 12 वाजेपर्यंत सुरू राहणार आहे.

14, 15 आणि 17 सप्टेंबरला 12 अतिरिक्त बसफेऱ्या

14, 15 आणि 17 सप्टेंबर रोजी सकाळी सहा आणि सायंकाळी सहा अशा एकूण 12 अतिरिक्त बसफेऱ्या चार मार्गांवर चालवल्या जाणार आहेत.

• मार्ग A-202 : माहिम बस स्थानक ते गोराई डेपो – प्रत्येकी दोन बस

• मार्ग 321 लिमिटेड : माहिम बस स्थानक ते बारवे नगर – प्रत्येकी एक बस

• मार्ग A-375 : बांद्रा पश्चिम बस स्थानक ते शिवाजीनगर डेपो – प्रत्येकी एक बस

• मार्ग A-C 71 : धारावी डेपो ते मीरा रोड रेल्वे स्थानक (पूर्व) – प्रत्येकी दोन बस

या दिवशी सकाळची बससेवा सकाळी 8 ते दुपारी 4 वाजेपर्यंत, तर सायंकाळची सेवा दुपारी 2 ते रात्री 11 वाजेपर्यंत सुरू राहणार आहे.

BESTने माऊंट मेरी यात्रेसाठी येणाऱ्या भाविक आणि नागरिकांना या अतिरिक्त बससेवेचा लाभ घेण्याचे आवाहन केले आहे.

हेही वाचा

तारकर्लीला सुरू होणार आधुनिक फेरीबोट सेवा