महाराष्ट्रात यंदा रस्ते अपघातांमधील मृत्यूंमध्ये लक्षणीय घट झाली आहे. कडक अंमलबजावणी, AI-आधारित मॉनिटरिंग आणि सुधारित आपत्कालीन प्रतिसाद प्रणालींचा सकारात्मक परिणाम आता प्रत्यक्ष दिसू लागला आहे.

राज्य परिवहन विभागाने जाहीर केलेल्या आकडेवारीनुसार, जानेवारी ते एप्रिल 2026 या कालावधीत रस्ते अपघातांतील मृत्यूंमध्ये मागील वर्षाच्या तुलनेत जवळपास 8 टक्क्यांची घट नोंदवण्यात आली आहे.

अधिकृत आकडेवारीनुसार, 2026 च्या पहिल्या चार महिन्यांत राज्यात 12,389 रस्ते अपघात आणि 5,233 मृत्यू नोंदवले गेले. तर 2025 मधील याच कालावधीत 12,610 अपघात आणि 5,681 मृत्यू झाले होते.

याशिवाय, प्राणघातक अपघातांची संख्या 5,275 वरून 4,827 वर आली आहे. अधिकाऱ्यांच्या मते, तंत्रज्ञानाधारित अंमलबजावणी, जिल्हानिहाय रस्ता सुरक्षा नियोजन आणि अपघातप्रवण भागांवर विशेष लक्ष यामुळे ही घट शक्य झाली आहे.

राज्यातील अनेक जिल्हे आणि शहरांमध्ये मृत्यूदरात मोठी घट दिसून आली. वाशीममध्ये सर्वाधिक 37 टक्के घट नोंदली गेली, तर बीड आणि नागपूर शहरात प्रत्येकी 29 टक्क्यांनी मृत्यू कमी झाले.

नाशिक शहरात 28 टक्के घट झाली असून, नवी मुंबईत 19 टक्क्यांनी मृत्यू कमी झाले. सांगली, सातारा आणि भंडारा जिल्ह्यांमध्येही सकारात्मक सुधारणा दिसून आल्या आहेत.

राज्य परिवहन विभागाने 2030 पर्यंत रस्ते अपघातांमध्ये 50 टक्के घट करण्याचे लक्ष्य ठेवले आहे. त्यासाठी राज्यभरात रडार आणि इंटरसेप्टर वाहनांनी सज्ज 332 विशेष पथके कार्यरत आहेत. हेल्मेट आणि सीटबेल्ट नियमभंग रोखण्यासाठी AI आणि रडार-आधारित प्रणालींचा वापर करण्यात येत आहे.

यंदाच्या जानेवारी ते एप्रिल दरम्यान हेल्मेट न घालणाऱ्या 2.64 लाखांहून अधिक वाहनचालकांवर कारवाई करण्यात आली. तर वेगमर्यादा ओलांडणाऱ्या 22 हजारांपेक्षा जास्त वाहनचालकांवर दंडात्मक कारवाई झाली. विमा नसलेली वाहने, वैध PUC प्रमाणपत्र नसणे आणि सीटबेल्ट नियमांचे उल्लंघन करणाऱ्यांवरही मोठ्या प्रमाणावर कारवाई करण्यात आली.

अतिरिक्त परिवहन आयुक्त भारत कळसकर यांनी सांगितले की, रस्ता सुरक्षा सुधारण्यासाठी तंत्रज्ञान, कडक अंमलबजावणी आणि जनजागृती या त्रिसूत्रीवर विभाग काम करत आहे.

“गोल्डन अवर”मध्ये जलद आपत्कालीन मदत, उत्तम पायाभूत सुविधा आणि पारदर्शक वाहन तपासणी प्रक्रियेच्या माध्यमातून पुढील काही वर्षांत अपघाती मृत्यू आणखी कमी करण्याचे राज्याचे उद्दिष्ट असल्याचे त्यांनी स्पष्ट केले.

हेही वाचा

मुंबई मेट्रो 11 प्रकल्पाच्या भूमिगत सर्वेक्षण कामाला वेग