दक्षिण मुंबईतील मलबार हिल येथील लोकप्रिय नॅचरल ट्रेल (Nature Trail) शुक्रवारी, 12 जून रोजी सकाळी एका मोठ्या झाडाच्या पडण्याच्या घटनेनंतर तात्पुरता बंद करण्यात आला आहे. परिसराची सुरक्षा तपासणी आणि दुरुस्तीची कामे पूर्ण होईपर्यंत नागरिकांना या मार्गावर प्रवेश दिला जाणार नाही, अशी माहिती मुंबई महापालिकेने दिली आहे.

महापालिकेच्या माहितीनुसार, झाड कोसळल्याच्या या घटनेत कोणतीही जीवितहानी किंवा दुखापत झालेली नाही. घटनेची माहिती मिळताच महापालिकेच्या उद्यान विभाग आणि जल अभियंता विभागाच्या पथकांनी तातडीने घटनास्थळी धाव घेत झाड हटविण्याचे काम सुरू केले.

नागरिकांच्या सुरक्षिततेच्या दृष्टीने निसर्ग मार्ग तात्पुरता बंद ठेवण्याचा निर्णय घेण्यात आला आहे. परिसरातील इतर झाडे किंवा मार्गावरील संरचनांमुळे कोणताही धोका निर्माण होण्याची शक्यता आहे का, याची सविस्तर तपासणी सुरू आहे.

महापालिकेने सोशल मीडिया प्लॅटफॉर्म ट्विटरवरील पोस्टमध्ये सांगितले की, पडलेले झाड हटविण्याचे काम युद्धपातळीवर सुरू असून नागरिकांनी सहकार्य करावे. दुरुस्तीची कामे पूर्ण होऊन परिसर सुरक्षित असल्याचे प्रमाणित झाल्यानंतरच निसर्ग मार्ग पुन्हा नागरिकांसाठी खुला केला जाईल.

A large tree fell on the Nature Trail at Malabar Hill earlier today. Fortunately, no injuries or casualties were reported in the incident.

Garden Department and the Hydraulic Engineer's Department immediately reached the site and commenced the work of removing the fallen tree.… pic.twitter.com/zrxy0iGY7t

— माझी Mumbai, आपली BMC (@mybmc) June 12, 2026

मुंबईच्या जैवविविधतेची ओळख करून देणारा उपक्रम

मलबार हिल येथील निसर्ग मार्ग हा मुंबई महानगरपालिकेच्या पर्यावरण जनजागृती उपक्रमाचा महत्त्वाचा भाग आहे. या प्रकल्पाद्वारे नागरिक आणि पर्यटकांना मुंबईतील हिरवळ, किनारी परिसंस्था आणि समृद्ध जैवविविधतेचा जवळून अनुभव घेण्याची संधी मिळते.

गर्दीच्या शहरी जीवनातून काही काळ निसर्गाच्या सान्निध्यात घालवण्यासाठी हा मार्ग लोकप्रिय ठरला असून, दक्षिण मुंबईतील प्रमुख आकर्षणांपैकी एक मानला जातो. मात्र, सुरक्षिततेला प्राधान्य देत सध्या हा मार्ग तात्पुरता बंद ठेवण्यात आला आहे.

हेही वाचा

BKC: ऑटोचालकांकडून अवाजवी भाडे आकारल्याच्या तक्रारी