महाराष्ट्र टाईम्सने दिलेल्या वृत्तानुसार, पावसाळ्यापूर्वीच्या कामांचा एक भाग म्हणून मोठ्या झाडांच्या विशेषत: धोकादायक ठरू शकणाऱ्या झाडांच्या फांद्यांच्या (tree branches) छाटणीची कामे मुंबई महापालिकेच्या उद्यान विभागाकडून केली जातात.

मात्र महापालिका आता सोसायटी, खासगी, तसेच सरकारी आस्थापना हद्दीतील झाडांच्या फांद्यांच्या छाटणीकडे दुर्लक्ष केल्यास ती छाटणी महापालिकेकडून (bmc) करण्याचे आणि त्याची वसुली मालमत्ता करातून (property tax) करण्याच्या विचारात आहे.

यासंदर्भात मुंबई (mumbai) महापालिका करनिर्धारण, संकलन आणि उद्यान विभागातील अधिकाऱ्यांची लवकरच बैठक घेणार आहे. हा निर्णय झाल्यास आपल्या हद्दीतील धोकादायक झाडांच्या फांद्यांच्या छाटणीकडे दुर्लक्ष करणाऱ्या सोसायटी, खासगी व सरकारी आस्थापनांना जरब बसेल, असे महापालिकेतील वरिष्ठ अधिकाऱ्याने सांगितले.

मुंबई महापालिकेच्या हद्दीत एकूण साधारणपणे 29 लाख 75 हजार झाडे आहेत. त्यापैकी साडेपंधरा लाखांहून अधिक झाडे खासगी संस्थांच्या आवारांमध्ये आणि उर्वरित झाडे शासकीय इमारती, महापालिकेच्या अखत्यारीत, तसेच विविध आस्थापनांच्या परिसरात आहेत.

या झाडांचे पावसाळ्यापूर्वी सर्वेक्षण करून छाटणीची कामे निश्चित करण्यात येतात. जी झाडे लहान असतात, ज्यांच्यापासून कोणताच धोका नसतो, अशा झाडांचा सर्वेक्षणात विचार केला जात नाही.

महापालिका त्यांच्या हद्दीतील झाडांच्या फांद्यांची छाटणी करते. मात्र सोसायटी, तसेच खासगी व सरकारी आस्थापना अनेकदा त्यांच्या हद्दीतील झाडांच्या फांद्यांची छाटणी करण्याकडे दुर्लक्ष करतात.

झाडांची छाटणी पूर्ण करून घेण्यासंदर्भात उद्यान विभागाकडून नोटीस बजावण्यात येते. त्यानुसार काही खासगी आणि सरकारी मालमत्ता याची अंमलबजावणी करतात, तर काही मालमत्ताधारक ते करत नाहीत. त्यामुळे फक्त वारंवार नोटीस बजावण्याशिवाय पर्याय नसतो.

ज्या सोसायट्या किंवा आस्थापना फांद्या छाटणीच्या अंमलबजावणीकडे दुर्लक्ष करतात, तेथे महापालिका उद्यान विभागाकडून कार्यवाही केली जाते. त्यांच्या हद्दीतील धोकादायक झाडाची फांदी पडून दुर्घटना घडल्यास त्याची जबाबदारी सोसायट्या, आस्थापनांसोबत महापालिकेवरही येते.

त्यामुळे यावर कठोर उपाय म्हणून सोसायट्या, आस्थापनांच्या हद्दीतील झाडांच्या फांद्यांची छाटणी महापालिकेने केल्यास त्याची मालमत्ता करातून वसुली करण्याचा पर्याय मुंबई महापालिकेने निवडला आहे.

गेल्या वर्षीही यावर विचारविनिमय होत होता. मात्र त्याची अंमलबजावणी करण्यासंदर्भात महापालिका आग्रही आहे. यंदाच्या पावसाळ्याआधी महापालिका करनिर्धारण आणि संकलन विभाग आणि उद्यान विभागात बैठक पार पडली होती.

आता पुन्हा एकदा महापालिकेच्या दोन्ही विभागांत लवकरच बैठक होणार आहे. उद्यान विभागाला यासंदर्भात प्रस्ताव पाठवण्यास सांगण्यात येणार आहे, असे वरिष्ठ अधिकाऱ्याने सांगितले.

मुंबईत 24 वॉर्ड आहेत. झाडांच्या फांद्यांची छाटणी न करणाऱ्या आणि महापालिकेच्या नोटिसकडे दुर्लक्ष करणाऱ्या वॉर्डमधील सोसायट्या, खासगी व सरकारी आस्थापनांची माहिती मागवली जाईल.

त्यानुसार त्याला मालमत्ता कराचे बिल पाठवताना त्यात फांद्यांच्या छाटणीच्या कामाची माहिती आणि त्याची आकारणी नमूद केली जाणार असल्याचे सांगितले. सध्या रस्त्याच्या कडेला असलेल्या 1 लाख 6 हजार झाडांच्या फांद्या छाटणीचे उद्दिष्ट आहे. त्यापैकी आत्तापर्यंत 39 हजार झाडांच्या फांद्याच्या छाटणीची कामे पूर्ण झाली आहेत.

हेही वाचा

महाराष्ट्रात कोरोनाच्या रुग्णसंख्येत वाढ

मुंबईतील 'या' पुलांची होणार दुरुस्ती