गेल्या काही वर्षांपासून विविध कारणांमुळे पाणीटंचाईचा सामना करणाऱ्या बदलापूरकरांना दिलासा मिळणार आहे.

राज्य सरकारने सुवर्ण जयंती नगरोत्थान महाअभियान अंतर्गत 260 कोटींची वाढीव पाणीपुरवठा योजना मंजूर केली आहे. यामध्ये दोन नवीन जलशुद्धीकरण केंद्र (water purification centre), 14 पाण्याच्या टाक्या आणि नवीन जलवाहिन्या असतील.

याच्या मदतीने सन 2056 मध्ये सुमारे साडेसात लाख लोकसंख्येसाठी पुरेशी पाणी क्षमता या योजनेद्वारे निर्माण केली जाणार आहे.

क्षमतेनुसार पाणीसाठा नसल्यामुळे बदलापूर (badlapur) शहराला गेल्या काही वर्षांपासून पाण्याची समस्या भेडसावत आहे. महाराष्ट्र जीवन प्राधिकरणामार्फत शहराला पाणीपुरवठा केला जातो. मात्र, जलाशयाच्या शेवटच्या टोकावरील घरांमध्ये कमी दाबाने पाणी येत असल्याच्या तक्रारी आहेत. बदलापूर शहराची लोकसंख्या दिवसेंदिवस वाढत आहे. त्यामुळे भविष्यात पाण्याची समस्या निर्माण होऊ शकते.

त्यामुळे बदलापूर शहरासाठी वाढीव पाणीपुरवठा योजना मंजूर करण्याची मागणी मुरबाड विधानसभा मतदारसंघाचे आमदार किसन कथोरे यांनी केली. त्यानुसार राज्य सरकारने 260 कोटी रुपयांच्या वाढीव पाणीपुरवठा योजनेला मान्यता दिली आहे. यामुळे सुमारे 7 लाख 62 हजार लोकसंख्येला पाणीपुरवठा करण्याची क्षमता निर्माण होईल जी 2056 पर्यंत वाढेल. त्यामुळे पुढील 32 वर्षांसाठी पाण्याची व्यवस्था असेल.

वाढीव पाणीपुरवठा योजनांमुळे बदलापूर (badlapur)व मुरबाडमधील (murbad) नागरिकांना निश्चितच दिलासा मिळेल, अशी प्रतिक्रिया आमदार किसन कथोरे यांनी दिली आहे.

योजना

या योजनेत उल्हास नदीकाठी वालीवली येथे विहीर बांधण्यात येणार आहे. पूर्व आणि पश्चिम विभागासाठी अनुक्रमे खरवई आणि बेलवली येथे जलशुद्धीकरण प्रकल्प उभारण्यात येणार आहेत.

खरवई येथे 54 दशलक्ष लिटर क्षमतेचा आणि बेलवली येथे 60 दशलक्ष लिटर क्षमतेचा प्रकल्प उभारण्यात येणार आहेत. बदलापूर (badlapur) शहराच्या पूर्व आणि पश्चिम विभागात सुरळीत पाणी वितरणासाठी 14 पाण्याच्या टाक्या बांधण्यात येणार आहेत.

मुरबाडसाठीही नवीन योजना

नगरोत्थान अभियानांतर्गत मुरबाड (murbad) शहरासाठी 31 कोटी 18 लाख रुपयांची वाढीव पाणीपुरवठा योजनाही मंजूर करण्यात आली आहे.

2056 ची संभाव्य लोकसंख्येची गरज पूर्ण करण्यासाठी ही योजना आखण्यात आली आहे. मुरबाड तालुक्यातील शिरवली ठाकूरवाडी धरण हे पाण्याचे मुख्य स्त्रोत असेल. तसेच अजून सहा नवीन जलाशय बांधण्यात येणार आहेत.

हेही वाचा

ठाण्यातील 'या' 6 मोठ्या प्रकल्पांमुळे वाहतूक कोंडी कमी होणार

माझी लाडकी बहिन योजना: महाराष्ट्र सरकारला 44 लाख ऑनलाइन अर्ज प्राप्त