कोरोनाच्या पार्श्वभूमीवर मुंबईसह राज्यभरात मार्च महिन्यात लॉकडाऊन करण्यात आलं. यामुळं वाहतूक सेवेसह प्रार्थनास्थळही बंद ठेवण्यात आले होते. मात्र, हळुहळु अनलॉक होत असून, राज्य सरकारनं वाहतूक सेवेनंतर आता सोमवारपासून प्रार्थनास्थळ उघडण्यास परवानगी दिली आहे. त्यामुळं सर्व प्रमुख धर्मस्थळांच्या व्यवस्थापनांनी कोरोना प्रतिबंधक उपाययोजना करून भाविकांना प्रवेश देण्याची तयारी केली आहे.
मुंबईतील सिद्धिविनायक मंदिर आणि पंढरपुरातील विठ्ठल मंदिर व्यवस्थापनांनी दर्शनासाठी पूर्वनोंदणी बंधनकारक केली आहे. अन्य धर्मस्थळेही भाविकांसाठी सज्ज झाली आहेत.
प्रभादेवी येथील सिद्धिविनायक मंदिरातील प्रवेशासाठी पूर्वनोंदणी बंधनकारक करण्यात आली आहे. त्यामुळं नोंदणीशिवाय नागरिकांना बाप्पाचं दर्शन घेता येणार नाही. सिद्धिविनायक गणपती मंदिर न्यासानं तयार केलेल्या 'अॅप'वर पूर्वनोंदणी केल्यावर क्यूआर कोड मिळणार आहे. एका तासात शंभर भाविकांनाच दर्शन घेता येणार आहे.
महालक्ष्मी आणि मुंबादेवी मंदिरात फुले, पूजासाहित्य, प्रसाद, ओटीचे साहित्य नेण्यास मनाई करण्यात आली आहे. त्याचप्रमाणे मंदिरात भाविकांनाही कोणत्याही प्रकारचा प्रसाद देण्यात येणार नाही. लहान मुले, ज्येष्ठ नागरिक, गरोदर महिला, आजारी व्यक्ती यांना मंदिरात प्रवेश देण्यात येणार नाही.