गुरुवारी, २३ डिसेंबर रोजी, मुंबईच्या कुर्ला पोलिसांनी लसीकरण न केलेल्यांना बनावट लसीकरण प्रमाणपत्रे विकल्याच्या आरोपाखाली दोघांना अटक केली आहे. हे दोघे तरूण १९ वर्षांचे आहेत.
कुर्ल्यामध्ये एक व्यक्ती बनावट लसीकरण प्रमाणपत्रे विकत असल्याची माहिती पोलिस अधिकाऱ्यांना मिळाली. त्यामुळे त्यांनी त्याच्यासाठी सापळा रचला. एल वॉर्डच्या सहाय्यक वैद्यकीय अधिकारी लुबना अन्सारी यांच्या मदतीनं बनावट प्रमाणपत्र घेण्यासाठी डमी ग्राहक आरोपीकडे पाठवण्यात आला.
ग्राहक असल्याचं भासवणाऱ्या व्यक्तीनं वडाळा इथल्या रहिवासी असलेल्या झुबेर शेख या आरोपींपैकी एकाची भेट घेतली. शेख यानं दोन्ही प्रमाणपत्रांसाठी तीन हजार रुपयांची मागणी केली.
कुर्ला पोलिस स्टेशनचे सहाय्यक पोलिस निरीक्षक सुशांत बांगर यांनी नमूद केलं की, त्यांनी शेखला केंद्रीय आरोग्य आणि कुटुंब कल्याण मंत्रालयाचा शिक्का असलेली प्रमाणपत्रे डाउनलोड केल्यानंतर अटक केली.
शेखनं चौकशीत त्याच्या साथीदाराचे नाव १९ वर्षीय अल्फेझ हसन खान असल्याचं सांगितलं जो प्रमाणपत्रे मिळवण्यासाठी जबाबदार होता. खानच्या घरावर पोलिसांनी छापा टाकला आणि त्याला बुधवारी, २२ डिसेंबर रोजी संध्याकाळी पकडण्यात आलं.
उत्तर प्रदेशातील प्रतापगड इथल्या डॉक्टरांच्या मदतीनं किशोरवयीन बनावट लसीकरण प्रमाणपत्रे तयार करत असल्याचं पोलिस अधिकाऱ्यांनी सांगितलं. बांगर यांनी खानची चौकशी केली तेव्हा त्यांनी प्रतापगडमधील एखाद्या व्यक्तीच्या संपर्कात असल्याचं उघड केलं ज्याने स्थानिक डॉक्टरांकडून प्रमाणपत्रे मिळविली आणि खान यांना ईमेलद्वारे पाठवली. ही बनावट प्रमाणपत्रे अनेकांना दिल्याचं या अटकेतील आरोपींनी सांगितलं.
किशोरवयीन मुलांवर भारतीय दंड संहितेच्या अनेक कलमांखाली फसवणूक आणि फसवणूक तसंच कोविड-19 नियमांचे उल्लंघन केल्याबद्दल आणि माहिती तंत्रज्ञान कायदा, २००० च्या संबंधित कलमांखाली गुन्हा दाखल करण्यात आला आहे.
पोलिस प्रतापगडमधील डॉक्टर आणि संपर्क व्यक्तीचा शोध घेण्याचा प्रयत्न करत आहेत. हा घोटाळा अन्यत्र केला जात आहे का? याचाही शोध घेण्याचा प्रयत्न ते करत आहेत.
हेही वाचा
Share
Tweet
