राज्याच्या आदिवासी विकास विभागातील वरिष्ठ अधिकाऱ्याने दिलेल्या माहितीनुसार, 384 मृत्यू सरकारी आश्रमशाळांमध्ये, तर 200 मृत्यू अनुदानित आश्रमशाळांमध्ये झाले आहेत.
महाराष्ट्रात सध्या 500 सरकारी आणि 513 अनुदानित आश्रमशाळा असून, या शाळांमध्ये आदिवासी विद्यार्थ्यांसाठी निवासी व्यवस्था असते.
सरकारी आश्रमशाळांमध्ये 2024-25 मध्ये 170 विद्यार्थ्यांचा, तर 2025-26 मध्ये 214 विद्यार्थ्यांचा मृत्यू झाला.
यापैकी 36 विद्यार्थ्यांचा मृत्यू शाळेच्या परिसरात, तर 348 विद्यार्थ्यांचा मृत्यू घरी झाला.
अनुदानित आश्रमशाळांमध्ये 2024-25 मध्ये 81, तर 2025-26 मध्ये 119 विद्यार्थ्यांचा मृत्यू झाला. यातील 30 मृत्यू शाळेच्या परिसरात, तर 170 मृत्यू घरी झाले.
अधिकाऱ्यांच्या माहितीनुसार, विद्यार्थ्यांच्या मृत्यूची कारणे सर्पदंश, सिकल सेल, गंभीर आजार, अपघात आणि आत्महत्या अशी विविध आहेत.
गडचिरोलीतील धनोरापासून सुमारे 10 किलोमीटर अंतरावर असलेल्या जपतलाई गावातील अनुदानित आदिवासी निवासी शाळेच्या वसतिगृहात 9 ऑगस्टच्या मध्यरात्री झोपलेल्या विद्यार्थिनींना विषारी सापाने दंश केला.
या घटनेत 8, 12 आणि 14 वर्षांच्या तीन मुलींचा मृत्यू झाला. तर 11 ते 14 वयोगटातील आणखी तीन मुलींवर उपचार सुरू होते.
या घटनेनंतर मुख्यमंत्री देवेंद्र फडणवीस यांनी संबंधित अनुदानित निवासी शाळेचा परवाना कायमस्वरूपी रद्द करण्याचे आदेश दिले आहेत.
गडचिरोलीचे जिल्हाधिकारी अविष्यांत पांडा यांनीही सविस्तर चौकशीचे आदेश दिले आहेत. विद्यार्थ्यांच्या निवासस्थानी आवश्यक सुरक्षा उपाययोजना होत्या का, शाळा व्यवस्थापनाने सुरक्षा नियमांचे पालन केले का आणि नेमकी घटना कशी घडली, याचा तपास केला जाणार आहे.
दरम्यान, महायुती सरकारच्या काळात प्रशासकीय हलगर्जीपणा आणि भ्रष्टाचारामुळे ही परिस्थिती निर्माण झाल्याचा आरोप काँग्रेसने केला आहे. त्यामुळे आश्रमशाळांमधील विद्यार्थ्यांच्या सुरक्षेचा आणि सरकारच्या देखरेखीचा मुद्दा पुन्हा ऐरणीवर आला आहे.
हेही वाचा
Share
Tweet
