संशोधन आणि नवोपक्रमामध्ये स्थानिक व जागतिक गरज पाहणे महत्त्वाचं आहे. यात आंतरशाखीय दृष्टिकोन, उद्योग, शैक्षणिक सहकार्य आणि आंतरराष्ट्रीय सहकार्य या माध्यमातून संशोधन व विकास करणं गरजेचं आहे.
- डॉ. सुहास पेडणेकर, कुलगुरू मुंबई विद्यापीठ
यासाठी विद्यापीठामधील कलिना कॅम्पसमध्ये लवकरच 'इनक्युबेशन' केंद्र स्थापन करण्यात येणार असून कॉलेजांनीही संशोधनासाठी 'इनक्युबेशन' केंद्र स्थापन करण्यात येणार असल्याचं कुलगुरू पेडणेकर यांनी सांगितलं.
मुंबई विद्यापीठानं पहिल्या टप्प्यात ६ लाख विद्यार्थी आणि ७९१ कॉलेजांना जलद संवादाचं माध्यम म्हणून मोबाइल अॅप सुरू करण्यात आलं आहे. या अॅपचं अनावरण मुंबई विद्यापीठचे कुलगुरू डॉ. सुहास पेडणेकर यांच्या हस्ते करण्यात आलं आहे. या अॅपच्या माध्यमातून विद्यार्थांना प्रवेशापासून ते परीक्षेच्या प्रवेशपत्रापर्यंतच्या सर्व सुविधा उपलब्ध होणार आहेत. Mum e-Suvidha असं या अॅपचं नाव आहे.
विद्यापीठाने आयोजित केलेल्या फोर्टमधील दीक्षांत सभागृहात प्राचार्यांच्या बैठकीत मोबाइल अॅपचं अनावरण करण्यात आलं. यावेळी डॉ. पेडणेकर यांनी प्राचार्यांसमोर शैक्षणिक वर्ष २०१८-१९ मध्ये होणाऱ्या अनेक शैक्षणिक घडामोडींची माहिती दिली. तसंच यावेळी प्राचार्यांनीही विद्यापीठाकडून विविध अपेक्षा व्यक्त केल्या.
या बैठकीला विद्यापीठाचे कुलसचिव डॉ. दिनेश कांबळे उपस्थित होते. यावेळी डॉ. उदय साळुंखे, सुचित्रा सुर्वे, स्वाती साळुंखे आणि राजेश यांनी प्राचार्यांना मार्गदर्शन केलं.
अॅपची वैशिष्ट्ये
हे अॅप अँड्रॉइड फोन वापरणाऱ्यांसाठी असणार असून प्लेस्टोअरमधून ते Mum e-Suvidha या नावाने डाऊनलोड करता येईल. विद्यार्थांना विद्यापीठानं दिलेला पीआरएन हा १६ अंकी क्रमांक त्याचा युजर आयडी असणार असून याचा पासवर्ड विद्यर्थ्यांना कॉलेजच्या माध्यमातून देण्यात येणार आहे.
जर एकदा विद्यर्थी पासवर्ड विसरला असेल तर विद्यापीठाच्या डिजिटल युनिव्हर्सिटी संकेतस्थळावरून फॉरगॉट पासवर्डच्या माध्यमातून त्याला पासवर्ड मिळवता येईल. या मोबाइल अॅपमधून महाविद्यालय आणि विद्यार्थ्यास प्रवेश व परीक्षासंदर्भात विविध सुविधा उपलब्ध होतील.
विविध सूचना
विद्यार्थ्यास परीक्षेच्या तारखा, परीक्षेचं वेळापत्रक, हॉलतिकीट अशा सुविधा मिळतील. तसंच महाविद्यालयाच्या विद्यार्थ्यांना विविध सूचना या अॅपमार्फत पाठवले जातील. तसंच महाविद्यालयाला या अॅपमधून प्रवेश आणि परीक्षा संबंधाची सर्व माहिती मिळेल. यामुळे कॉलेज आणि विद्यार्थ्यांना विद्यापीठाच्या विविध सूचना तात्काळ प्राप्त होतील.
कधी झालं उद्घाटन?
विद्यापीठाच्या माहिती आणि तंत्रज्ञान विभागाने बनवलेल्या ३६० अंश व्हर्च्युअल टूरच्या माध्यमातून फोर्ट आणि कलिना कॅम्पस विभागातील विद्यापीठाच्या विविध इमारतीची ३६० अंशात विविध छायाचित्रे तयार करण्यात आले आहेत. याचंही उद्घाटन शुक्रवारी करण्यात आलं आहे. ही व्हर्च्युअल टूर विद्यापीठाच्या संकेतस्थळावर उपलब्ध होणार आहे.
पूरग्रस्तांना मदत निधी
याप्रसंगी कुलगुरू डॉ. सुहास पेडणेकर यांनी केरळच्या पूरग्रस्तांना सर्व महाविद्यालयांनी मदत करावी, असं आवाहन केलं. तसंच विद्यापीठातील सर्व विभागप्रमुखांनी एक दिवसाच वेतन देण्याचं मान्य केलं.