मुंबईकरांनो अाणि मुंबईत कामानिमित्त येणाऱ्यांनो आणि पर्यटकांनो जरा सावधान... कारण पुढचे दोन दिवस अर्थात ४८ तास मुंबईकराच्या जिवाची काहिली-काहिली होणार अाहे. पुढील ४८ तासांत मुंबईत उष्णतेची लाट उसळणार असून मुंबईतलं तापमान ३७ अंश सेल्सियसवर जाणार असल्याची माहिती हवामान खात्यातील एका वरिष्ठ अधिकाऱ्याने 'मुंबई लाइव्ह'ला दिली. दोन दिवसांत उष्णता वाढणार असल्यानं मुंबईकरांनी आणि पर्यटकांनी योग्य ती काळजी घ्यावी, असं आवाहनही हवामान खात्यानं केलं आहे.
मार्च महिना उजाडला की, मुंबईत उकाड्याला सुरूवात होते आणि एप्रिल-मे महिन्यात उष्णतेचा पारा अधिक वाढत जातो. मार्चमध्ये सहसा तापमान ३० ते ३३ अंश सेल्सियस असतं. पण यंदा मार्च महिन्याची सुरुवातच उकाड्यानं होणार आहे. मुंबईत पुढच्या ४८ तासांत उष्णतेची लाट उसळणार असल्याचा इशारा हवामान खात्यानं दिला आहे. त्यामुळे मुंबईकरांना पुढचे दोन दिवस जरा विशेष काळजी घ्यावी लागणार आहे. मार्च महिन्यात मुंबईत ३३ अंश सेल्सियसपर्यंत तापमान असतं, ते पुढच्या दोन दिवसांत थेट ३७ अंश सेल्सियसपर्यंत पोहोचणार आहे. त्यामुळे मुंबईतील उकाडा चांगलाच वाढणार आहे.
Share
Tweet
