उर्मिला कोठारेने जानेवारी महिन्यात एका गोंडस मुलीला जन्म दिला. या नव्या पाहुणीच्या अगमनाने कोठारे कुटुंब प्रचंड खूष आहे. आदिनाथ आणि उर्मिलाने आपल्या मुलीच्या आगमनाची जोरदार तयारी केली होती. नुकतंच या गोंडस मुलीचं बारसं मोठ्या उत्साहात पार पडलं.
उर्मिला आणि आदिनाथने आपल्या लाडक्या बाहुलीचं नाव 'जिजा' असं ठेवलं आहे. आदिनाथने सोशल मीडियावर जिजाच्या नावाची घोषणा केली. आदिनाथने आपल्या चिमुकलीचे फोटोही शेअर केले आहेत. या फोटोला जिजा आदिनाथ कोठारे असं कॅप्शन त्याने दिलं आहे.
या आधी उर्मिलाने इंस्टाग्रामवर आपल्या मुलीची एक झलक तिच्या चाहत्यांना दाखवली होती.
'शुभमंगल सावधान' हा उर्मिलाचा पहिला चित्रपट. या चित्रपटात उर्मिला मुख्य भुमिकेत होती. महेश कोठारे यांनी या चित्रपटाचं दिग्दर्शन केलं होतं. तर आदिनाथ या चित्रपटाचा सहाय्यक दिग्दर्शक होता. उर्मिलाला सेटवर पाहताच क्षणी आदिनाथ तिच्या प्रेमात पडला होता. याच सेटवर त्यांच्यात चांगली मैत्री झाली. त्यांनतर आदिनाथने पुण्यातील एका कॉफी शॉपमध्ये उर्मिलाला प्रपोज केलं. ११ डिसेंबर २०११रोजी हे दोघेही लग्नबंधनात अडकले.
लवकरच आदिनाथ धकधक गर्ल माधुरीसोबत चित्रपटात झळकणार आहे. आदिनाथने माधुरीसोबत सोशल मीडियावर एक फोटोही शेअर केला आहे. हा फोटो शेअर करताना 'समथिंग न्यू आणि वर्किंग विथ लिजंड' असं कॅप्शनही दिलं आहे. पण हा कोणता चित्रपट आहे? त्यात कोण कोण कलाकार आहेत? या विषयी मात्र गुप्तता पाळण्यात आली आहे.
हेही वाचा
उर्मिलाने शेअर केले तिच्या बेबीमूनचे फोटो!