मनी लॉंड्रिंग प्रकरणी ईडी कोठडीत असणारे राज्याचे अल्पसंख्यांक मंत्री नवाब मलिक यांच्या अडचणीत आणखी वाढ होण्यची शक्यता आहे. मनी लॉंड्रिंग प्रकरणी अटकेत असलेल्या नवाब मलिक यांच्याबाबत नवी माहिती ईडीच्या हाती लागली आहे. शिवाय राज्याचे अर्थसंकल्पीय अधिवेशन सुरू असून, या अधिवेशनात नवाब मलिक यांच्या राजीनाम्याची भाजपाकडून केली जात आहे. त्यामुळं नवाब मलिक यांच्या अडचणी आणखी वाढण्याची शक्यता वर्तवली जात आहे.
काही दिवसांपूर्वी ईडीनं कुर्ल्यातील ३ एकर जमिनीच्या व्यवहारात झालेल्या मनी लाँड्रिंगच्या आरोपात मलिक यांना अटक केली. आता ईडीच्या हाती नवी माहिती लागली आहे. मुंबईतील बीकेसीमध्ये नवाब मलिक यांच्याशी संबंधित आणखी एक मालमत्ता असल्याची माहिती मिळाली आहे.
मिळालेल्या माहितीनुसार, बीकेसीतील भूखंड हा जवळपास २०० कोटी रुपये किंमतीचा आहे. ईडीच्या सूत्रांनुसार, नवाब मलिक यांचे पुत्र फराज याची टचवूड रिअल इस्टेट या कंपनीत २५ टक्के भागीदारी आहे आणि हा भूखंड या कंपनीशी संबंधित आहे. हा भूखंड २००६ साली खरेदी करण्यात आला होता. त्याच्या पैशांची देवाणघेवाण ३ वेळा वेगवेगळ्या खरेदीदारांच्या माध्यमातून झाली होती.
ईडीकडून पैशांच्या देवाणघेवाणीशी संबंधित व्यक्तींकडेही चौकशी करण्यात येत आहे. टचवुड रिअल इस्टेट कंपनीनं अन्य एका कंपनीसोबत १२.७ कोटी रुपयांचे ट्रान्जेक्शन केलेले आहे, अशी माहिती तपासात उघड झाल्याचे समजते. आता ही कंपनी ईडीच्या रडारवर असून, त्या दिशेने तपास सुरू असल्याची माहिती समोर येत आहे. ईडीने राज्याचे मंत्री नवाब मलिक यांना मनी लाँड्रिंग प्रकरणात अटक केली आहे. ३ मार्चपर्यंत ते ईडी कोठडीत असून, त्यांची ईडी कोठडी गुरूवारी संपत आहे. त्यामुळे गुरूवारी त्यांना पीएमएलए कोर्टात हजर करण्यात येईल.