मध्य रेल्वेवरील भायखळा रेल्वेस्थानकाला नवी झळाळी मिळाली आहे. गेल्या चार वर्षांपासून सुरू असलेले स्थानक सुशोभीकरणाचे काम आता पूर्ण झाले आहे. एका स्वयंसेवी संस्थेनं हे काम पूर्ण केले असून, स्थानकाची देखभाल आता मध्य रेल्वे करणार आहे.

भायखळा स्थानकाच्या सुशोभीकरणाचे आणि पुनरोद्धाराचे काम २०१८ मध्ये हाती घेण्यात आले. 'आय लव्ह मुंबई बजाज ट्रस्ट ग्रुप'च्या सहकार्यानं आणि हेरिटेज कॉन्झर्व्हेशन आर्किटेक्ट आभा लांबा आणि कैस कन्स्ट्रक्शन यांनी एकत्रितपणे हे काम केले. वर्षभर कामे वेगानं झाल्यानंतर कोरोना काळात या कामांचा वेग मंदावला. अखेर आता हे काम पूर्ण झाले आहे.

स्थानकातील छताची ठेवण पुरातन वास्तूप्रमाणे करण्यात आलेली आहे. दरवाजे, खिडक्या दुरुस्त करून अतिरिक्त बांधकामे हटवण्यात आली आहेत. पारंपरिक रंगसंगतीच्या आधारे रंगकाम करून विद्युत-टेलिफोन केबल तारा सुस्थितीत करण्यात आल्या आहेत.

 सुरुवातीला हे स्थानक लाकडी संरचनेत बांधण्यात आले होते. त्यानंतर १८५७ पुन्हा नव्याने बांधण्यात आले. वर्तमानात असलेल्या स्थानकाचे सुशोभीकरण १८५७ स्थानकानुसार करण्यात आले आहे. प्रवाशांच्या सुविधेसाठी तिकीट घर, आरपीएफ कार्यालयदेखील सुस्थितीत करण्यात आल्याचे 'आय लव्ह मुंबई' या संस्थेकडून सांगण्यात आले.

रेल्वे स्थानकाचे काम पूर्ण झाल्यावर याची माहिती देणे आणि स्थानकाची देखभाल मध्य रेल्वेने करावी यासाठी रेल्वे राज्य मंत्री रावसाहेब दानवे यांची भेट घेण्यात आली. २९ एप्रिल रोजी हे स्थानक अधिकृतपणे मध्य रेल्वेकडे सुपूर्द करण्यात येईल, अशी माहिती भाजप नेत्या शायना एन. सी. यांनी दिली.

---

हेही वाचा

मध्य रेल्वे सर्व एसी लोकलचे वॉटरप्रूफिंग करणार

बेस्टमध्ये टॅप-इन/टॅप-आउट तिकीट सेवा 'या' आठवड्यापासून होणार सुरू