पर्यटनासाठी माथेरानला जाणाऱ्या प्रवाशांसाठी मध्य रेल्वेकडून विषेश सेवा पुरवण्यात येणार आहे. अमन लॉज ते माथेरान दरम्यानची शटल आता ६ कोचऐवजी ८ कोचची होणार असून १ डिसेंबरपासून ही शटल प्रवाशांच्या सेवेत दाखल होणार आहे.
काही दिवसांपूर्वी या माथेरान राणीला व्हिस्टाडोम (पारदर्शक) डबाही जोडण्याचा निर्णय मध्य रेल्वेनं घेतल्याने माथेरानला जाणाऱ्या प्रवाशांचा प्रवास आणखीनच सुखकर होणार आहे.
काही वर्षांपासून माथेरानची शटल सेवा सतत रुळावरून घसरण्याच्या दुर्घटना घडत होत्या. त्यामुळे प्रवाशांच्या सुरक्षेच्या दृष्टीने मध्य रेल्वेनं ८ कोचऐवजी ६ कोच चालवण्याचा निर्णय घेतला होता. परंतु, आता या मार्गावरील सर्व कामं पूर्ण झाली असल्यामुळे मध्य रेल्वेनं पुन्हा एकदा ८ कोचची शटल सेवा सुरू करण्याचा निर्णय घेतला आहे.
१ डिसेंबरपासून सुरू होणाऱ्या शटल ट्रेनच्या ८ कोचमध्ये एक फर्स्ट क्लास, ५ सेकेंड क्लास सीटिंग आणि २ जनरल सेकंड क्लास अशा ८ कोचचा समावेश असणार आहे.
येत्या विकेंडला म्हणजे शनिवारी १ डिसेंबर आणि रविवारी २ डिसेंबर रोजी मध्य रेल्वंने विशेष सेवा चालवण्याचा निर्णय घेतला आहे. सकाळी ९ वाजता नेरळ स्थानकातून सुटणारी मिनी ट्रेन ११.५० वाजता माथेरान स्थानकात पोहोचेल. याशिवाय दुपारी २.२० वाजता माथेरान स्थानकातून सुटणारी मिनी ट्रेन संध्याकाळी ५ वाजता नेरळ स्थानकात पोहोचेल.