सर्वसामान्यपणे आपल्याकडे केक कापून वाढदिवस साजरा केला जातो. लहानांपासून मोठ्यांपर्यंत, एवढंच काय, अगदी अबालवृद्धांपर्यंत सर्वांचेच जन्मदिवस, लग्नाचे वाढदिवस केक कापूनच साजरे केले जातात. पण बॉलिवूडचे महानायक बिग बी अमिताभ बच्चन यांनी या पद्धतीवर आक्षेप घेतला आहे. 'ही इंग्रजांची पद्धत आहे' अशा शब्दांत अमिताभने या पद्धतीवर नाराजी व्यक्त केली आहे.
अमिताभ बच्चन यांनी ट्विटरवर या प्रथेवर आपलं मत व्यक्त केलं आहे. 'इंग्रज त्यांच्या मागे हॅप्पी बर्थ डेची प्रथा सोडून गेले आणि आपणही त्याचे गुलाम झालो आहोत. आपण केक का कापतो? मेणबत्ती का लावतो? ती फुंकून का विझवतो? आपल्या संस्कृतीमध्ये दिवे प्रज्वलित करतात, पण हे आपल्याला तेच विझवायला सांगतात', अशा शब्दांत अमिताभ बच्चन यांनी नाराजी व्यक्त केली आहे.
T 2816 - अंग्रेज़ Happy Birthday की प्रथा छोड़ गए और हम अभी भी उसके ग़ुलाम हैं ! ये cake क्यूँ ? ये candle क्यूँ ? ये फूँक कर बुझाना क्यूँ ? हमारी सभ्यता में दीप प्रज्वलित करते हैं ; ये उसे फूँक कर बुझाने को कहते हैं ! और ये गाना क्यूँ ! ये गाइए : वर्ष नव, हर्ष नव ...
— Amitabh Bachchan (@SrBachchan) May 24, 2018
बिग बी अमिताभ बच्चन नेहमीच त्यांच्या नाती नव्या आणि आराध्या या दोघींसाठी आयुष्यभराची शिकवण देणारी पोस्ट ट्विटवर लिहितात. त्यांच्या या पोस्ट व्हायरलही होतात. मात्र यावेळी त्यांनी वाढदिवशी केक कापणं आणि मेणबत्ती विझवणं ही आपली संस्कृती नसल्याचं सांगण्याचा प्रयत्न केला आहे.
नुकताच अमिताभ बच्चन यांचा अभिनेते ऋषी कपूर यांच्यासोबतचा '१०२ नॉट आऊट' हा चित्रपट प्रदर्शित झाला आहे. यामध्ये अमिताभ बच्चन यांनी १०२ वर्षांच्या वृद्धाची भूमिका साकारली आहे, तर ऋषी कपूर यांच्या त्यांच्या ७५ वर्षांच्या मुलाची भूमिका साकारली आहे. लवकरच अमिताभ बच्चन आमिर खान आणि कतरिना कैफ यांच्यासोबत 'ठग्ज ऑफ हिंदोस्तान' या चित्रपटात अॅक्शन करताना दिसणार आहेत!
हेही वाचा
बिग बी अमिताभ बच्चन यांची मुलगीही आता अभिनयात!