हिंसक आणि भडकाऊ पोस्टमुळे भाजप समर्थक अभिनेत्री कंगना रनौटचे ट्विटर अकाउंट बंद करण्यात आलं आहे. पश्चिम बंगालमध्ये निवडणुकीनंतर झालेल्या हिंसाचाराच्या घटनांवर तिनं एक ट्विट केलं होतं. सोबतच, एक व्हिडिओ देखील जारी केला होता.
व्हिडिओमध्ये तिनं पश्चिम बंगालच्या निवडणुकीनंतर तृणमूल काँग्रेस आणि ममता बॅनर्जी समर्थकांकडून हिंसाचार वाढल्याचं म्हटलं होतं. तसंच पंतप्रधान नरेंद्र मोदींनी आपले २००२ चे विराट रूप दाखवून द्यावे असे शब्द वापरले होते. त्यानंतर तिचे ट्विटर अकाउंट सस्पेंड करण्यात आलं.
कंगनानं पश्चिम बंगालमध्ये निवडणुकीनंतर झालेल्या हिंसाचाराच्या घटनांवर ट्विट केलं होतं की, "हे अतिशय भयंकर आहे. गुंडगिरीला मारण्यासाठी आपल्याला महागुंडगिरी आणायला हवी. ती एक राक्षसी आहे. तिला नियंत्रणात आणण्यासाठी मोदीजींना आपल्या २००० च्या दशकातील विराट रूप दाखवावे लागेल." यासोबत तिनं पश्चिम बंगालमध्ये राष्ट्रपती राजवटीची मागणी करणारा एक हॅशटॅग सुद्धा वापरला.
कंगनानं यासोबत एक व्हिडिओ सुद्धा जारी केला होता. त्यामध्ये ती रडून हिंदूंवर अत्याचाराचे आंतरराष्ट्रीय षडयंत्र रचलं जात असल्याचा दावा केला होता. कुठलंही माध्यम हे दाखवत नाही. असं मुद्दाम केलं जात आहे. पंतप्रधान नरेंद्र मोदी आणि सरकारनं यावर काही करायला हवं. सरकार देशद्रोह्यांना घाबरतं की काय असंही तिनं व्हिडिओमध्ये रडता-रडता म्हटलं होतं.
हेही वाचा
Share
Tweet
