गूड न्यूज! पीपीएफवर मिळणार ८ टक्के व्याजदर!! इतर योजनांवर किती...वाचा

केंद्र सरकारने पीपीएफ, एनसीएस, सुकन्या समृद्धी योजना इ. छोट्या बचत योजनांवरील व्याजदरांत ०.४० टक्क्यांपर्यंत वाढ करत छोटे गुंतवणूकदार आणि नोकरदारांना गणेशोत्सवात गूड न्यूज दिली आहे. ही व्याजदरवाढ २०१८-१९ या चालू आर्थिक वर्षाच्या तिसऱ्या तिमाहीसाठी म्हणजेच १ आॅक्टोबर ते ३१ डिसेंबर दरम्यान लागू असेल.

दर ३ महिन्यांना आढावा

छोट्या बचत योजनांवरील व्याजदरांचा दर तीन महिन्यांनी आढावा घेण्यात येतो. त्यानुसार मागील अनेक महिन्यांपासून व्याजदर स्थिरच होते. किंबहुना जानेवारी ते मार्च २०१८ या तिमाहीत व्याजदर घटवण्यात आले होते. त्यामुळे गुंतवणूकदारांमध्ये नाराजी होती. ही नाराजी या व्याजदरवाढीमुळे काही प्रमाणात दूर होईल, असं म्हटलं जात आहे.

कुठल्या योजनांचा समावेश?

या योजनांमध्ये सार्वजनिक भविष्य निर्वाह निधी (पीपीएफ), नॅशनल सेव्हिंग सर्टिफिकेट (एनएससी), किसान विकास पत्र (केव्हीपी), सुकन्या समृद्धी याेजना, पोस्टाच्या मुदत ठेवी (टीडी), रिकरिंग डिपाॅझिट (आरडी), मंथली इन्कम अकाऊंट आणि ज्येष्ठ नागरिक बचत योजनेचा समावेश आहे.

किती व्याजदरवाढ?

अर्थ मंत्रालयानं जारी केलेल्या परिपत्रकानुसार यापुढं 'पीपीएफ' ७.६ टक्क्यांऐवजी ८ टक्के व्याजदर मिळेल. किसान विकास पत्रावर (११८ महिन्यांसाठी) ७.३ टक्क्यांऐवजी ७.७ टक्के व्याज (११२ महिन्यांसाठी) मिळेल. सुकन्या समृद्धी योजनेवर ८.१ टक्क्यांऐवजी ८.५ टक्के व्याज मिळेल. एनएससीवर ८ टक्के व्याज मिळेल. तर ज्येष्ठ नागरिक बचत योजनेवर ८.७ टक्के व्याज मिळणार आहे. सरकारने बचत खात्यावरील व्याजदरांत कुठलीही वाढ केलेली नाही. त्यामुळे पूर्वीप्रमाणेच या खात्यातील रकमेवर ४ टक्के व्याज मिळेल.

हेही वाचा-

तीन बँकांचं विलिनीकरण १ एप्रिलपासून होण्याची शक्यता

सोन्या-चांदीला झळाळी, किती रुपयांनी महागलं? वाचा...