Advertisement

बँक एफडी की कॉर्पोरेट एफडी? गुंतवणूक करण्याआधी जाणून घ्या ह्या बाबी

मुदत ठेवींवरील व्याज घटल्याने गुंतवणूकदार पर्यायी गुंतवणूकीची साधने शोधतात. जास्त जोखीम न घेता परतावा चांगला मिळेल अशा गुंतवणूक पर्यायांकडे गुंतवणूकदारांचा कल राहतो. अशा परिस्थितीत कॉर्पोरेट फिक्स्ड डिपॉजिट (एफडी) गुंतवणूकदारांना आकर्षित करत आहेत.

बँक एफडी की कॉर्पोरेट एफडी? गुंतवणूक करण्याआधी जाणून घ्या ह्या बाबी
SHARES

कोरोनाचा संसर्ग रोखण्यासाठी लागू केलेल्या लाॅकडाऊनचा मोठा फटका देशाच्या अर्थव्यवस्थेला बसला आहे. अर्थव्यवस्थेला चालना देण्यासाठी रिझर्व्ह बँक ऑफ इंडियाने अलिकडच्या काळात रेपो दरात १.१५ टक्के कपात केली आहे. त्यानंतर बँकांनी त्यांच्या मुदत ठेवीवरील व्याज दर कमी केले आहेत. आता बर्‍याच मोठ्या बँका त्यांच्या मुदत ठेवींवर ६ टक्के व्याज देत आहेत.

मुदत ठेवींवरील व्याज घटल्याने गुंतवणूकदार पर्यायी गुंतवणूकीची साधने शोधतात. जास्त जोखीम न घेता परतावा चांगला मिळेल अशा गुंतवणूक पर्यायांकडे गुंतवणूकदारांचा कल राहतो. अशा परिस्थितीत जास्त व्याज देणाऱ्या कॉर्पोरेट फिक्स्ड डिपॉजिट (एफडी) गुंतवणूकदारांना आकर्षित करत आहेत. 

कॉर्पोरेट एफडी म्हणजे काय?

 कॉर्पोरेट एफडी कंपनीद्वारे केल्या जातात. कॉर्पोरेट एफडी मुख्यत्वे बँक एफडी प्रमाणेच असते. या एफडीमध्ये बँक एफडीपेक्षा जास्त व्याज दर असतात. कॉर्पोरेट एफडी १२ महिने ते १२० महिन्यांच्या कालावधीसाठी असतात. कॉर्पोरेट एफडीवर काही कंपन्या ८.०९ टक्के व्याज देत आहेत.तर ज्येष्ठ नागरिकांना अर्धा टक्के अधिक व्याजदरही मिळत आहे.

कॉर्पोरेट एफडी कंपन्यांच्या व्यवसायाशी संबंधित आहे, म्हणून जोखीम बँक ठेवींपेक्षा थोडी जास्त आहे. जर कंपनी बुडाली तर पैसे गमावण्याची भीती आहे. मात्र मजबूत आणि उच्च रेटिंग्ज असलेल्या कंपन्यांच्या एफडी कमी धोकादायक असतात.  बँक एफडीप्रमाणेच कॉर्पोरेट एफडी घेता येते. यासाठी कंपनी फॉर्म देते. तसंच या एफडी ऑनलाईनही करता येतात.

याशिवाय बँक एफडीमध्ये गुंतवणूकदाराला ठेवी विमा आणि पत गॅरंटी कॉर्पोरेशनकडून ५ लाख रुपयांचे विमा संरक्षण मिळते. हे विमा संरक्षण कॉर्पोरेट एफडीला लागू होत नाही. बँक एफडीप्रमाणेच कॉर्पोरेट एफडीमधून मिळणाऱ्या व्याजवरही कर सवलत मिळते.

कॉर्पोरेट एफडी निवडताना या गोष्टी लक्षात ठेवा

- एएए किंवा एए रेटिंग्ज असलेल्या कंपन्यांच्या एफडीमध्ये गुंतवणूक कमी धोकादायक असेल.   गुंतवणूक करण्यापूर्वी कंपनीचे क्रेडिट रेटिंग तपासणे आवश्यक आहे. कंपनी रेटिंग जितके चांगले असेल तितके धोका कमी होईल.

- बर्‍याच वेळा, कमी रेटिंग्ज असलेल्या कंपन्या जास्त व्याज देतात. मात्र, अधिकरेटिंग्ज असणार्‍या कंपन्यांमध्ये सुरक्षा अधिकअसते.

- कॉर्पोरेट एफडीच्या बाबतीत दीर्घकालीन योजनेऐवजी अल्प मुदतीची योजना निवडा. अल्प-मुदतीच्या एफडीवर जोखीम कमी असते.

- बँक आणि कॉर्पोरेट एफडीच्या व्याजदरात ३ ते ४ टक्के फरक असेल तेव्हाच कॉर्पोरेट एफडीत गुंतवणूक करा.

- कॉर्पोरेट एफडीमध्ये गुंतवणूक करण्यापूर्वी त्या कंपनीच्या १० ते २० वर्षांचे रेकाॅर्ड पहा. त्याच कंपन्यांच्या ठेवींमध्ये गुंतवणूक करा जी नफा कमवत आहेत आणि तुम्हाला 5 वर्षांपासून लाभांश देत आहेत. 

कॉर्पोरेट एफडी जारी करणार्‍या कंपन्या

बजाज फायनान्स

व्याज दर : १ वर्षापासून ५ वर्षाच्या एफडीवर ७.७२ टक्के ते ८.७५ टक्के.

रेटिंगः  क्रिसिल - एफएएए, आयसीआरए— एमएएए

महिंद्रा फायनान्स

व्याज दर : १ वर्ष ते ५वर्षांच्या एफडीवर ७.३ टक्के ते ८.५५ टक्के

रेटिंगः  क्रिसिल - एफएएए

पीएनबी गृहनिर्माण विशेष ठेव

व्याज दर : २२ महिन्यांच्या एफडीवर ७.५ टक्के

रेटिंगः क्रिसिल - एफएएए

पीएनबी हाऊसिंग (५ कोटींपर्यंत)

व्याज दर : ७.२५ टक्के ते ७.५ टक्के 

रेटिंगः  क्रिसिल - एफएएए

एचडीएफसी (२ कोटींपर्यंत)

व्याज दर : जास्तीत जास्त ७.४ टक्के

रेटिंगः क्रिसिल - एफएएए

आयसीआयसीआय होम फायनान्स

व्याज दर: जास्तीत जास्त ७.५ टक्के

रेटिंगः  आयसीआरए - एमएएए, केअर - एएए

याशिवाय श्री राम ट्रान्सपोर्ट, डीएचएफएल, केरळ ट्रान्सपोर्ट डेव्हलपमेंट फायनान्स कॉर्पोरेशन, एल अॅन्ड टी फायनान्स लिमिटेड, इंडियाबुल्स हाऊसिंग, एलआयसी हाउसिंग फायनान्स यासारख्या काही कंपन्या एफडीवर वार्षिक जास्तीत जास्त ८.५ टक्के व्याज देत आहेत. 



हेही वाचा-

महिलांसाठी योग्य आर्थिक नियोजन आवश्यक, आर्थिक सुरक्षेसाठी लक्षात घ्या ह्या ७ बाबी

लग्नाआधीच नवरी पळून गेल्यास मिळेल विमा, जाणून घेऊया लग्न विम्याबद्दल



संबंधित विषय
Advertisement