पश्चिम रेल्वेच्या ऐतिहासिक वांद्रे स्थानकाला नवा साज

१५० वर्षांपेक्षा जुने असलेल्या पश्चिम रेल्वे मार्गावरील वांद्रे स्थानकाला नवा साज मिळणार आहे.

SHARE

१५० वर्षांपेक्षा जुने असलेल्या पश्चिम रेल्वे मार्गावरील वांद्रे स्थानकाला नवा साज मिळणार आहे. या स्थानकाचं संवर्धन व जपणूक करण्यासाठी विविध कामं हाती घेण्यात येणार आहेत. त्यासाठी निविदा काढण्यात आली आहे. तसंच, येत्या डिसेंबरमध्ये ही निविदा खुली करण्यात येणार आहे. त्यामुळं या स्थानकाच्या प्रत्यक्षात कामाला नवीन वर्षांतच सुरुवात होणार आहे. या कामासाठी १० कोटी रुपयांपेक्षा जास्त खर्च येणार असल्याची माहिती पश्चिम रेल्वे प्रशासनानं दिली.

स्थानकाचं नूतनीकरण

वांद्रे स्थानकाच्या पश्चिमेला १ नंबर प्लॅटफॉर्मला लागूनच जुने कौलारू छप्पर, दरवाजे, खिडक्या आणि अन्य ऐतिहासिक वास्तूही आहेत. ऐतिहासिक वास्तूंना धक्का न लागता या स्थानकाचं नूतनीकरण व संवर्धन कसं करावं हा पश्चिम रेल्वेसमोर प्रश्नच होता. हे काम करताना स्थानकालाही नवा साज देण्याचा निर्णयही घेतला आहे.

सल्लागाराची नियुक्ती

या कामासाठी सल्लागाराची नियुक्ती केल्याची माहिती मिळते. त्याचा अहवाल प्राप्त झाल्यानंतर वांद्रे स्थानकातील कामासाठी निविदा काढण्यात आली आहे. डिसेंबर २०१९ मध्ये निविदा खुली करण्यात येणार आहे. त्यानंतर वास्तुविशारद व काही तज्ज्ञांच्या देखरेखीखाली वांद्रे स्थानकाचं काम केलं जाणार आहे.


हे होणार बदल


  • वांद्रे पश्चिमेला फलाट क्रमांक एकला लागूनच असलेल्या परिसरात जुन्या खिडक्या, दरवाजे, कौलारू छप्पर व अन्य साहित्य आहे. त्यांची दुरुस्ती करण्यात येईल. शक्य असल्यास तशाच प्रकारचे खिडक्या, दरवाजेही बसवण्याचा प्रयत्न आहे.
  • स्थानकात प्लास्टर करतानाच ज्या ठिकाणी पावसाळ्यात गळती लागते तेथीलही काम करण्यात येणार आहे.
  • संपूर्ण स्थानकाला रंगरंगोटी केली जाणार आहे.
  • स्थानकातील प्रवेशद्वार, तिकीट खिडक्या, खाद्यपदार्थ स्टॉल्समध्ये सुधारणा करतानाच त्याच्या आरेखनात बदल केले जाणार आहेत.
  • इमारत दुरुस्तीचं काम हाती घेतलं जाणार आहे.



हेही वाचा -

हार्बर सेवेचा लवकरच बोरिवलीपर्यंत विस्तार

आघाडीच्या नेत्यांची उद्धव ठाकरेंशी चर्चा- संजय राऊत



संबंधित विषय
ताज्या बातम्या