मुंबई वाहतूक विभागाने १० जूनपासून दुचाकीवर बसलेल्या दोन्ही प्रवाशांसाठी (चालक आणि मगे बसलेला सहप्रवासी) हेल्मेट घालणं सक्तीचं केलं आहे. दुचाकीवरून प्रवास करताना हेल्मेट न वापरणाऱ्या लोकांवर वाहतूक पोलिसांनी १० जूनपासून कडक कारवाई करण्यास सुरुवात केली आहे.
मात्र आता आगामी काळात दुचाकी खरेदी करणाऱ्यांना पोलिसांनी दिलासा देण्याचं काम केलं आहे. मुंबई वाहतूक विभागाने नवीन परिपत्रक जारी करून दुचाकी खरेदी करताना कंपनी, डीलरकडून हेल्मेट घ्या असं सांगितलं आहे. दुचाकीसोबत हेल्मेट देणं कंपन्यांसाठी बंधनकारक करण्यात आलं आहे.
मुंबई वाहतूक विभागाने जारी केलेल्या परिपत्रकात म्हटलं आहे की, मुंबई शहरात मोटार वाहन कायदा १९८८ च्या कलम १२९ अन्वये दुचाकी वाहनाचा चालक आणि सह प्रवासी (Pillion Rider) यांनी हेल्मेट वापरणे बंधनकारक आहे.
तसेच केंद्रिय मोटार वाहन नियम १९८९ च्या नियम १३८(४)(एफ) अन्वये दुचाकी वाहन खरेदी करणाऱ्यास दुचाकी वाहन उत्पादक कंपनीने दुचाकी वाहनासोबत हेल्मेट (Protective Headgear) देणे आवश्यक आहे. त्यामुळे दुचाकी खरेदीदारांनी केंद्रिय मोटार वाहन नियम १९८९ च्या नियम १३८(४)(एफ) नियमाप्रमाणे दुचाकी वाहन खरेदी करताना वाहन विक्रेत्यांकडून, डीलरकडून हेल्मेटची मागणी करावी.
हेही वाचा
Share
Tweet
