महाराष्ट्र (maharashtra) अन्न व औषध प्रशासनाने (FDA) राज्यभरातील रक्तपेढ्या (blood banks) आणि रक्त साठवणूक केंद्रांविरुद्ध मोठी मोहीम हाती घेतली आहे.
गेल्या तीन महिन्यांत नियमनविषयक आणि सुरक्षिततेच्या निकषांचे उल्लंघन केल्याप्रकरणी 38 केंद्रांवर कारवाई केली आहे. या मोहिमेचा भाग म्हणून, 34 परवाने निलंबित करण्यात आले आहेत आणि चार परवाने कायमस्वरूपी रद्द करण्यात आले आहेत.
रक्त संकलन, चाचणी, साठवणूक, गुणवत्ता नियंत्रण आणि जैव-वैद्यकीय कचरा व्यवस्थापन यांबाबत 'ड्रग्ज अँड कॉस्मेटिक्स ॲक्ट, 1940' (औषधे आणि सौंदर्य प्रसाधने कायदा) आणि संबंधित नियमांचे पालन केले जात आहे की नाही, हे तपासण्यासाठी एप्रिल ते जून या कालावधीत केलेल्या तपासणीनंतर ही कारवाई करण्यात आली.
सध्या महाराष्ट्रात 413 परवानाधारक रक्तपेढ्या आणि 468 परवानाधारक रक्त साठवणूक केंद्रे कार्यरत आहेत.
FDA च्या मते, तपासणीदरम्यान परवान्याच्या अटींचे उल्लंघन, गुणवत्ता व्यवस्थापन प्रणालीतील त्रुटी, नोंदींमधील विसंगती, विहित मानकांचे पालन न करणे आणि इतर नियमनविषयक उणिवा यांसारख्या बाबी आढळून आल्या.
कारवाई करण्यात आलेल्या केंद्रांपैकी 21 रक्तपेढ्या आणि 13 रक्त साठवणूक केंद्रांचे परवाने निलंबित करण्यात आले, तर दोन रक्तपेढ्या आणि दोन रक्त साठवणूक केंद्रांचे परवाने कायमस्वरूपी रद्द करण्यात आले.
मुंबईमध्ये (mumbai) वैधानिक नियमांचे गंभीर उल्लंघन झाल्याचे तपासणीत आढळल्यानंतर FDA ने 'सर जे.जे. मेट्रोपॉलिटन ब्लड सेंटर'चा परवाना कायमस्वरूपी रद्द केला.
तसेच, 'माया ब्लड सेंटर'चा परवानाही रद्द करण्यात आला. कारण तिथे मोठ्या अनियमितता आढळून आल्या होत्या, ज्यामुळे रक्त सुरक्षिततेशी तडजोड झाली होती, असे नियामकाने नमूद केले.
FDA आयुक्त तुकाराम मुंडे यांनी सांगितले की, रक्त हा जीव वाचवणारा घटक आहे आणि तो कृत्रिमरित्या तयार करता येत नाही.
तसेच त्यामुळे सुरक्षितता आणि गुणवत्तेच्या मानकांचे काटेकोर पालन करणे अत्यंत आवश्यक आहे.
रुग्णांना सुरक्षित आणि दर्जेदार रक्त मिळावे यासाठी विभाग नियमित आणि अचानक तपासणी करत राहील आणि नियमांचे उल्लंघन करणाऱ्या संस्थांविरुद्ध कठोर कायदेशीर कारवाई करेल, असेही त्यांनी स्पष्ट केले.
हेही वाचा
Share
Tweet
