मुंबईतील 'ही' ठिकाणं 'शांतता क्षेत्र' म्हणून घोषित

श्रावणाच्या आगमनानंतर सण-उत्सवांची चाहूल लागते आणि या उत्सवांच्या निमित्ताने आवाजाची पातळी ओलांडून ध्वनी प्रदूषण होतं. आता गणेशोत्सव अवघ्या काही दिवसांवर येऊन ठेपला आहे. दरम्यान आवाजाची पातळी ओलांडून ध्वनी प्रदूषण होऊ नये म्हणून राज्य शासनाने मुंबई महानगरपालिका क्षेत्रातील 110 ठिकाणं आता 'शांतता क्षेत्र' म्हणून घोषित केली आहेत.

तर कारवाई

शांतता क्षेत्र म्हणून घोषित करण्यात आलेल्या ठिकाणी रात्री दहा ते सकाळी सहा यावेळेत लाऊडस्पीकर, फटाके, वाद्य वाजवण्यास सक्त बंदी असेल. शांतता क्षेत्रात वर्गवारी करत वेगवेगळ्या ठिकाणी 50 ते 75 डेसिबलची मर्यादा घालून देण्यात आली आहे. या क्षेत्रात ध्वनिप्रदूषण नियमांचं उल्लंघन केल्यास पर्यावरण संरक्षण कायद्यानुसार 5 वर्ष कैद. एक लाख रुपये दंड किंवा दोन्ही शिक्षेची तरतूद करण्यात आली आहे.

नियमांचं उलंघन झाल्यास...

उच्च न्यायालयाच्या आदेशानंतर सणांच्या कालावधीत होणारं ध्वनिप्रदूषण रोखण्यासाठी मुंबई पोलिसांकडून प्रयत्न सुरू आहेत. शिवाय नियमांचं उलंघन झाल्याचं आढळून आल्यास जागरूक नागरिकांना तक्रार करता येण्यासाठी सरकारने दूरध्वनी क्रमांक, ईमेल, व्हॉट्सअॅप क्रमांकही उपलब्ध करून दिले आहेत.

येथे करा तक्रार

23089855, 23719857, 26457900
addlcpsouth@gmail.com, acpcentralopr.mum@mahapolice.gov.in
9987093065, 9302100100

जर पहिल्या कारवाईनंतरही पुन्हा उल्लंघन झालं तर दररोज 5 हजार रुपये दंड भरावा लागणार आहे. याशिवाय कलम 15(1)नुसार शिक्षा झाल्यापासून एक वर्षपर्यंतच्या काळात पुन्हा असा गुन्हा केल्यास 7 वर्षांपर्यंतची शिक्षा होऊ शकते.

'या' स्थळांचा समावेश

राज्य सरकारने जाहीर केलेल्या शांतता क्षेत्रामध्ये रुग्णालये, शाळा, कॉलेजे, प्रार्थनास्थळे, न्यायालयाचा समावेश आहे. शहर आणि उपनगरातील अनेक स्थळे या यादीत आहेत. यामध्ये केईएम रुग्णालय, रुपारेल कॉलेज, माऊंट मेरी चर्च, बाणगंगा, बॉम्बे रुग्णालय, सिडनहॅम कॉलेज, मुंबई विद्यापीठ, उच्च न्यायालय, साठे कॉलेज, पार्ले टिळक विद्यालय यांचा समावेश आहे.