मुख्यमंत्री देवेंद्र फडणवीस यांच्या नेतृत्वाखालील महाराष्ट्र सरकार येत्या दोन दिवसांत, म्हणजे शुक्रवार 6 मार्च रोजी, 2026–27 या आर्थिक वर्षाचा राज्याचा अर्थसंकल्प विधानसभेत सादर करणार आहे.
या अर्थसंकल्पात अनेक महत्त्वाच्या आर्थिक तरतुदी जाहीर होण्याची शक्यता आहे. विशेषतः लाडकी बहीण योजनेवर लक्ष केंद्रित केले जाणार आहे. काही वृत्तसंस्थांच्या अहवालानुसार, या योजनेअंतर्गत मिळणारी मासिक मदत रक्कम 2,100 पर्यंत वाढवण्याची घोषणा होऊ शकते, अशी चर्चा आहे. मात्र याबाबत अद्याप अधिकृत घोषणा झालेली नाही.
मागील अर्थसंकल्पात 2025–26 या आर्थिक वर्षासाठी लाडकी बहीण योजनेसाठी सुमारे 36,000 कोटींची तरतूद करण्यात आली होती. आता 2026–27 साठी नवीन निधीची घोषणा अपेक्षित आहे.
महिलांसाठीच्या कल्याणकारी योजनांव्यतिरिक्त, शेतकऱ्यांसाठीही महत्त्वाचे निर्णय जाहीर होऊ शकतात. कर्जमाफी किंवा इतर दिलासा उपाययोजनांबाबत घोषणा होण्याची शक्यता वर्तवली जात आहे.
दरम्यान, मासिक मदत 2,100 करण्याचा निर्णय दोन वर्षांपूर्वी जाहीर करण्यात आला होता. मात्र तो अद्याप अंमलात आलेला नाही. त्यामुळे यंदाच्या अर्थसंकल्पात ही घोषणा प्रत्यक्षात येते का, याकडे सर्वांचे लक्ष लागले आहे.
राज्य सरकारवर सध्या 9 लाख कोटींपेक्षा जास्त कर्ज आहे. केंद्र सरकार आणि रिझर्व्ह बँकेने घालून दिलेल्या मर्यादेत राहून कर्ज घेण्यात आले असले, तरी राज्याची आर्थिक स्थिती मोठ्या नव्या खर्चाच्या योजना जाहीर करण्याइतकी मजबूत नाही. तसेच राजकीयदृष्ट्याही तातडीची गरज नाही.
त्यामुळे फडणवीस सरकार नव्या योजना जाहीर करण्यापेक्षा सुरू असलेल्या प्रकल्पांना प्राधान्य देणार आहे. सिंचन योजना आणि इतर पायाभूत सुविधा प्रकल्प पूर्ण करण्यावर भर दिला जाण्याची शक्यता आहे.
हेही वाचा
Share
Tweet
