मुंबईच्या प्रस्तावित रिंग रोड नेटवर्कचा विस्तार होणार असून, मुंबई महानगर प्रदेश विकास प्राधिकरण अर्थात MMRDA आणखी दोन रिंग रोड विकसित करण्याच्या तयारीत आहे. या दोन मार्गांची एकूण लांबी सुमारे 307 किलोमीटर असेल. त्यामुळे मुंबईतील प्रस्तावित रिंग रोडचे जाळे 7 वरून 9 रिंग रोडपर्यंत वाढणार आहे.

या विस्तारामुळे मुंबईसोबत ठाणे, नवी मुंबई, भिवंडी आणि मुंबईच्या उत्तरेकडील उपनगरांना पर्यायी मार्गाने जोडणे शक्य होणार आहे.

नव्या रिंग रोडपैकी आठवा रिंग रोड सुमारे 197 किमी, तर नववा रिंग रोड जवळपास 110 किमी लांबीचा असेल. दोन्ही मार्ग अॅक्सेस-कंट्रोल्ड कॉरिडॉर असतील आणि त्यांची डिझाइन स्पीड 80 किमी प्रतितास ठेवण्यात आली आहे. MMRDAचे हे दोन्ही मार्ग 2029 पर्यंत कार्यान्वित करण्याचे लक्ष्य आहे.

महत्त्वाचं म्हणजे, हे 307 किमीचे संपूर्ण नवीन रस्ते बांधले जाणार नाहीत. विद्यमान महामार्ग, फ्रीवे, सी लिंक, बोगदे आणि उन्नत मार्ग यांना सध्या सुरू असलेल्या किंवा प्रस्तावित प्रकल्पांशी जोडून हे रिंग रोड तयार केले जाणार आहेत.

नववा रिंग रोड : नरीमन पॉइंट ते बोरिवली आणि ठाणे

110 किमीचा नववा रिंग रोड नरीमन पॉइंटपासून सुरू होईल. मुंबईच्या किनारी मार्गाने उत्तरेकडे जात हा मार्ग वांद्रे-वरळी सी लिंक, वर्सोवा-बांद्रा सी लिंक आणि प्रस्तावित उत्तरी कोस्टल रोडमार्गे बोरिवलीपर्यंत पोहोचेल.

यानंतर ठाणे-बोरिवली ट्विन टनेलमधून हा मार्ग ठाण्यात दाखल होईल.

पुढे ठाणे कोस्टल रोड-1, आनंदनगर-साकेत एलिव्हेटेड रोड, ईस्टर्न फ्रीवे एक्स्टेंशन आणि ईस्टर्न फ्रीवे यांच्या माध्यमातून हा मार्ग पुढे जाईल.

त्यानंतर प्रस्तावित ऑरेंज गेट टनेल आणि मरीन ड्राइव्ह कनेक्शनच्या माध्यमातून हा रिंग रोड पुन्हा नरीमन पॉइंटच्या दिशेने जोडला जाईल आणि त्याचा लूप पूर्ण होईल.

या रिंग रोडमुळे दक्षिण मुंबई, पश्चिम उपनगरे, बोरिवली, ठाणे आणि पूर्व मुंबई यांना पर्यायी ऑर्बिटल मार्ग मिळणार आहे. त्यामुळे लांब पल्ल्याच्या वाहतुकीला शहरातील गर्दीच्या अंतर्गत रस्त्यांना वळसा घालता येणार आहे.

आठवा रिंग रोड : सेवरी-ठाणे-नवी मुंबई लूप

197 किमीचा आठवा रिंग रोड सेवरी, ठाणे आणि नवी मुंबईला जोडणारा लूप तयार करणार आहे.

मुंबई ट्रान्स हार्बर लिंकच्या मुंबईकडील सेवरी टोकापासून हा मार्ग सुरू होईल. पुढे ईस्टर्न फ्रीवे आणि त्याच्या ठाण्याकडे जाणाऱ्या विस्ताराचा वापर केला जाईल.

ठाण्यातून हा मार्ग आनंदनगर-साकेत एलिव्हेटेड रोडमार्गे पुढे जाईल. त्यानंतर मुंबई-वडोदरा एक्स्प्रेसवे आणि NH-4Bच्या माध्यमातून नवी मुंबईतील चिर्लेपर्यंत पोहोचेल.

तिथून मुंबई ट्रान्स हार्बर लिंकच्या माध्यमातून पुन्हा सेवरीला जोडून हा लूप पूर्ण होईल.

या मार्गामुळे ठाणे, नवी मुंबई आणि भिवंडीमधील कनेक्टिव्हिटी मजबूत होण्याची अपेक्षा आहे. यासोबतच JNPT, मालवाहतूक केंद्रे आणि अमणे यांसारख्या वेगाने विकसित होणाऱ्या भागांपर्यंत पोहोचणेही सोपे होणार आहे.

सात रिंग रोडच्या जुन्या प्लॅनमध्ये भर

MMRDAने यापूर्वी मुंबईसाठी सात टप्प्यांमध्ये वाढणाऱ्या रिंग रोडचे नियोजन केले होते. त्यातील सर्वात छोटा रिंग रोड सुमारे 27 किमीचा नरीमन पॉइंट लूप होता.

यामध्ये मुंबई कोस्टल रोड, सेवरी-वर्ली कनेक्टर, ईस्टर्न फ्रीवे आणि ऑरेंज गेट-मरीन ड्राइव्ह कनेक्शन यांना जोडण्याची संकल्पना होती.

कोस्टल रोड आणि ईस्टर्न फ्रीवे सुरू झाले असले तरी या लूपला पूर्णपणे जोडण्यासाठी आवश्यक असलेले काही दुवे अद्याप बांधकामाधीन किंवा प्रस्तावित आहेत.

MMRDAचे आयुक्त डॉ. संजय मुखर्जी यांनी 2024 मध्ये व्यापक रिंग रोड संकल्पना मांडली होती. यामागचा उद्देश मुंबईची सध्याची प्रामुख्याने उत्तर-दक्षिण दिशेची वाहतूक व्यवस्था बदलून पूर्व-पश्चिम आणि ऑर्बिटल कनेक्टिव्हिटी वाढवणे हा आहे.

अनेक प्रकल्प, एकच कनेक्टेड नेटवर्क

या विस्तारित रिंग रोड नेटवर्कमध्ये MMRDA, BMC, MSRDC आणि NHAI यांच्या अखत्यारीतील अनेक प्रकल्प एकमेकांशी जोडले जाणार आहेत.

यामध्ये सेवरी-वर्ली कनेक्टर, ऑरेंज गेट टनेल, गोरेगाव-मुलुंड लिंक रोड, ठाणे-बोरिवली ट्विन टनेल, JVLR, SCLR, ईस्टर्न फ्रीवे, कोस्टल रोड, सी लिंक आणि MTHL यांचा समावेश आहे.

मात्र या रिंग रोडची खरी परिणामकारकता सर्व प्रकल्पांमधील मिसिंग लिंक पूर्ण करणे, योग्य रॅम्प, कनेक्टर, इंटरचेंज आणि जंक्शन तयार करणे यावर अवलंबून असणार आहे.

वाहतूक अभ्यास, तांत्रिक व्यवहार्यता आणि उपलब्ध जागेच्या आधारे काही विद्यमान मार्गांची क्षमता वाढवण्याची किंवा रुंदीकरणाची शक्यताही MMRDA तपासत आहे.

एकूणच, मुंबई आणि संपूर्ण MMRमध्ये पर्यायी मार्गांचे जाळे तयार करून गर्दीच्या मुख्य रस्त्यांवरील वाहतुकीचा भार कमी करणे, हा या महत्त्वाकांक्षी रिंग रोड नेटवर्कचा मुख्य उद्देश आहे.

हेही वाचा

ऑर्किड सिटी सेंटर मॉल तात्काळ बंद करण्याचे आदेश