वरळीमधील एका निवासी इमारतीच्या लिफ्टमध्ये पाळीव कुत्रा शेजाऱ्याला चावल्यानंतर एका व्यक्तीस चार महिन्यांची शिक्षा सुनावण्यात आली आहे.

सात वर्षांनंतर या घटनेवर न्यायालयाने निर्णय दिला. हा निकाल 21 मे रोजी प्रथम वर्ग न्याय दंडाधिकारी सुहास भोसले यांनी दिला असून, तपशीलवार आदेश बुधवारी उपलब्ध झाला.

आरोपी ऋषभ पटेल (40) याला कलम 324 आणि कलम 289 (प्राण्याच्या बाबतीत निष्काळजीपणा) अंतर्गत दोषी ठरवण्यात आले. तसेच 4000 रुपयांचा दंड देखील ठोठावण्यात आला.

न्यायालयाने म्हटले की, पीडिताच्या यातनांना पैशाच्या स्वरूपात भरपाई देता येणार नाही, परंतु ही रक्कम त्याला थोडीशी दिलासा देईल. ही घटना 1 फेब्रुवारी 2018 रोजी घडली.

प्रसंगानुसार, तक्रारदार रामिक शहा हे आपल्या दीड वर्षांच्या मुलासह आणि सेवकासह लिफ्टने खाली उतरत होते. पटेल आपल्या हस्की जातीच्या कुत्र्यासह लिफ्टमध्ये शिरण्याचा प्रयत्न करीत होता.

शहा यांनी आपल्या मुलाला कुत्र्यांची भीती असल्यामुळे पटेलला थोडा वेळ थांबण्याची विनंती केली. मात्र, पटेलने दुर्लक्ष केले आणि लिफ्टमध्ये शिरल्यानंतर कुत्र्याने शहा यांच्या डाव्या हातावर चावले, असे आरोप पक्षाने सांगितले.

यानंतर शहा यांनी वरळी पोलस ठाण्यात तक्रार दाखल केली. चार साक्षीदारांची तपासणी न्यायालयीन सुनावणीत करण्यात आली, ज्यात रामिक शहा यांचा समावेश होता.

न्यायालयाने सीसीटीव्ही फुटेजचा उल्लेख करत म्हटले की, आरोपीने आपल्या कुत्र्याला ज्या प्रकारे लिफ्टमध्ये ओढून घेतले. त्यावरून त्याला आपल्या पाळीव प्राण्याबद्दलही सहानुभूती नाही.

आरोपीने तक्रारदार, त्यांचा मुलगा यांचा विचार न करता, लिफ्टमध्ये मानवी वापरासाठी असलेली जागा कुत्र्यासाठी वापरली. त्यामुळे त्याला फारशी दयामाया दाखवण्यास पात्र ठरवता येणार नाही, असे न्यायालयाने नमूद केले. त्याला चार महिन्यांच्या कठोर कारावासाची शिक्षा सुनावली.

हेही वाचा

दोन कुटुंबात हाणामारी, तिघांनी गमावले प्राण