शिवाजी महाराज पार्क मैदानात प्रचार सभा घेण्याच्या परवानगीकरीता मुंबई (mumbai) महानगरपालिकेकडे (BMC) महाराष्ट्र नवनिर्माण सेना (mns) व शिवसेना (उद्धव ठाकरे) (shiv sena ubt), शिवसेना (एकनाथ शिंदे) या तिन्ही पक्षांनी अर्ज केले आहेत.

निवडणुकीचा प्रचार 18 नोव्हेंबर रोजी संध्याकाळी 6 वाजता संपणार असून आदल्या दिवशी 17 नोव्हेंबर रोजी शेवटची प्रचार सभा राजकीय पक्षांना घेता येणार आहे. त्यामुळे या एका दिवसासाठी राजकीय पक्षांचे अर्ज आले असून तीनही पक्षांची प्रतिष्ठा पणाला लागली आहे.

विधानसभेच्या निवडणुकीसाठी 20 नोव्हेंबर रोजी मुंबईत मतदान (voting) होणार आहे. मतदानाला काही दिवस उरले असून प्रचाराला वेग आला आहे आणि राजकीय वातावरणही तापले आहे. येत्या काही दिवसात मुंबईत राजकीय पक्षांतील मोठ्या नेत्यांच्या राजकीय सभांचा धुरळा उडणार आहे.

सभांच्या आयोजनासाठी शिवाजी पार्क मैदान मिळावे यासाठी राजकीय पक्षांनी मुंबई महापालिकेकडे गेल्याच महिन्यात अर्ज केले आहेत. मात्र 17 नोव्हेंबरच्या सभेसाठी अद्याप निर्णय न झाल्यामुळे शिवसेना (उद्धव ठाकरे) आणि मनसे या पक्षांनी पालिकेला पुन्हा स्मरणपत्रे पाठवली आहेत.

मात्र त्यावर अद्यापही निर्णय झालेला नाही. ज्या पक्षांचे अर्ज आले आहेत त्यांच्या निवेदनासह परवानगीचा प्रस्ताव महापालिकेने राज्य सरकारकडे पाठवला असून नगर विकास विभागच त्यावर निर्णय घेणार आहे. या परवानगीसाठी पहिला अर्ज मनसेने केल्याचा दावा केला गेला आहे. त्यामुळे आता नक्की कोणाला परवानगी मिळणार याबाबत उत्सुकता आहे.