चांगलं अॅप्लिकेशन आणि सर्वात सुरक्षित अशी ओळख असणारा अॅपल कंपनीचा आयफोन सर्वांनाच हवा असतो. पण याच आयफोनचा डाटा लिक झाल्याने खळबळ उडाली आहे. याप्रकरणी अॅपल कंपनीने एका २७ वर्षीय तरुणावर व्ही. पी. रोड पोलिस ठाण्यात गुन्हा नोंदवला आहे. रुपेश कांबळे असं या आरोपीचं नाव असून तो विरारला राहणारा आहे.
महिन्याला अवघ्या २० हजार रुपयांच्या मोबदल्यासाठी त्याने हैद्राबाद येथील आपल्या मित्राला हा डेटा पाठवल्याचं चौकशीतून पुढे आलं आहे.
बी २ एक्स सर्व्हिस सोल्युशन्स इंडिया प्रा. लि. याठिकाणी अॅपल कंपनीच्या मोबाइल फोनच्या दुरूस्तीचं काम चालतं. या ठिकाणी चालणाऱ्या कामकाजावर तक्रारदार स्वाती सावंत मॅनेजर म्हणून काम पहातात. या ठिकाणी आरोपी रुपेश कांबळे १९ सप्टेंबर २०१७ मध्ये सर्व्हिस इंजिनीअर म्हणून कामाला होता. रुपेश विरारच्या मनवेलपाडा नाना-नानी पार्क, माऊलीकृपा इमारत क्र. ९ मध्ये रहातो.
६ ऑक्टोबर २०१७ रोजी या कंपनीनं रुपेशला कामकाजासाठी अॅपल कंपनीचा लॅपटॉप, यूझर आयडी आणि पासवर्ड दिला होता. त्यावरून रुपेश दिवसाला अंदाजे २० मोबाइल दुरूस्त करायचा. दरम्यान डिसेंबरच्या शेवटच्या आठवड्यात रुपेश वापरत असलेला आयडी लॉक झाल्याने त्याला कंपनीतील कर्मचारी सुशांतचा आयडी देण्यात आला होता.
कंपनीने रुपेशच्या आयडीमध्ये केलेल्या ऑपरेशनल चेकिंगमध्ये त्याचा पर्सनल ई-मेल आयडी लॉगइन होता. त्याद्वारे रुपेशने कंपनीच्या वेबसाईटवरून चोरलेल्या माहितीचे स्क्रिन शॉटस् पाठवल्याचं दिसून आलं. रुपेश कांबळेकडे केलेल्या चौकशीत त्याने अॅपल कंपनीची गोपनीय माहीती चोरून ती त्याच्या हैदराबाद येथील मित्र प्रदीप याला पाठवल्याचं कबूल केलं. त्यासाठी प्रदीप त्याला महिना २० हजार रुपये देत होता.
याप्रकरणी बी २ एक्स सर्व्हिस सोल्युशन्स इंडिया प्रा. लि.च्या मॅनेजर स्वाती सावंत यांच्या तक्रारीवरून व्ही. पी. रोड पोलिसांनी रुपेशवर गुन्हा नोंदवला असून अधिक तपास सुरू असल्याचं व्ही. पी. रोड पोलिस ठाण्यातील वरिष्ठ पोलिस अधिकाऱ्यानं सांगितलं.
हेही वाचा-
मुंबई हल्ल्याची सुनावणी पाकिस्तानात पुन्हा सुरू
किर्ती व्यासच्या मारेकऱ्यांना 31 मे पर्यंत न्यायालयीन कोठडी