द काऊन्सिल फॉर द इंडियन स्कूल सर्टिफिकेट एक्झामिनेशन (सीआयएससीई) बोर्डातर्फे घेण्यात आलेल्या आयसीएसईच्या दहावी आणि आयसीएसच्या बारावी परीक्षेचा निकाल सोमवारी १४ मे रोजी ऑनलाइन पद्धतीने जाहीर करण्यात येणार आहे. दुपारी तीनच्या सुमारास हा निकाल जाहीर होईल, असं बोर्डातर्फे स्पष्ट करण्यात आलं.
सीआयएससीईच्या दहावी-बारावीच्या विद्यार्थ्यांना www.cisce.org किंवा www.results.cisce.org या वेबसाईटवर निकाल पाहता येणार आहे. तसंच ०९२४८०८२८८३ या क्रमांकावर विद्यार्थ्यांचा बैठक क्रमांक पाठवल्यानंतरही तुम्हाला एसएमएसद्वारे निकाल मिळू शकणार आहे. हा निकाल जाहीर झाल्यानंतर विद्यार्थ्यांना सात दिवसांमध्ये २१ मे पर्यंत पुर्नतपासणीसाठी अर्ज करता येणार आहे.
यंदा २६ फेब्रुवारी ते २८ मार्च या दरम्यान दहावीची तर ७ फेब्रुवारी ते २ एप्रिल दरम्यान बारावीची परीक्षा घेण्यात आली होती. गेल्या वर्षी बारावीचा निकाल ९६.४७ टक्के, तर दहावीचा निकाल ९८.५३ टक्के लागला होता.