आयटीआय प्रवेश सोपं व्हावं, या उद्देशानं राज्य कौशल्य विकास विभागांतर्गत येणाऱ्या आयटीआयनं यंदा प्रवेशासाठी मोबाइल अॅप काढलं आहे. देशातील असा हा पहिलाच प्रयोग असून त्याची दखल केंद्रीय कौशल्य विकास मंत्रालयानं घेत इतर राज्यांनीही विद्यार्थ्यांना अशाप्रकार सुविधा उपलब्ध करून देण्याबाबत सूचना केल्या आहेत. दरम्यान यामुळ राज्य आयटीआच्या शिरपेचात आणखी एक मानाचा तुरा रोवला गेला आहे.
राज्य व्यवसाय शिक्षण आणि प्रशिक्षण संचालनालयाने काही दिवसांपूर्वी 'महा आयटीआय' या अँड्रॉइड अॅपची निर्मिती केली होती. ज्या उमेदवारांनी आयटीआय प्रवेशासाठी अधिकृत वेबसाइटवर ऑनलाइन अर्ज दाखल केल आहेत, त्यांना हे 'महा आयटीआय' अॅप्लिकेशन वापरता येणार आहे.
मागील दोन वर्षांत 'आयटीआय'कडून विद्यार्थ्यांना आकर्षित करण्यासाठी अनेक नव्या युक्ती वापरल्या जात आहेत. मॉडेल आयटीआय, खासगी कंपन्यांसोबत टाय-अप याचसोबत आता 'महा आयटीआय' ही संकल्पना त्यांनी प्रत्यक्षात आणली आहे. हे अॅप विद्यार्थ्यांना प्ले-स्टोअरवरून डाउनलोड करता येणार आहे.
'या' अॅपचे फायदे
या अॅपच्या मदतीने विद्यार्थ्यांना त्यांचं अॅडमिशन स्टेटस, सबमिट ऑप्शन फॉर्म, राज्यातील आयटीआय संस्थांची माहिती, मेरिट नंबर, जागावाटप, निवडपत्र, प्रवेश निश्चिती पावती आदी गोष्टी विद्यर्थ्यांना घरबसल्या पाहता येणार आहेत. यामुळे केंद्राकडून या अॅपचं विशेष कौतुक करण्यात आलं आहे. अशी सुविधा इतर राज्यांनीही द्यावी, असं पत्र केंद्रीय कौशल्य विकास विभागाने सर्व राज्यांना पाठवलं आहे.
आयटीआयला विक्रमी अर्ज
आयटीआयच्या विविध योजना आणि रोजगाराची हमी यामुळे या अभ्यासक्रमाकडे विद्यार्थ्यांचा कल वाढू लागला आहे. यंदा आयआयटीआसाठी चार लाख ३७ हजार विद्यार्थ्यांनी नोंदणी केली असून त्यापैकी तीन लाख ७७ हजार ७१४ विद्यार्थ्यांनी अर्ज सादर केले आहेत. यामुळे यंदा आयटीआयच्या चांगल्या शाखांच्या प्रवेशासाठी चांगलीच चुरस रंगणार आहे.
हेही वाचा -
'आयटीआय' प्रवेशाचं वेळापत्रक का झालं रद्द? वाचा...