राज्यात गेल्या काही वर्षांपासून विविध विभागातील रिक्त पदे भरली गेलेली नाहीत. त्यामुळे स्पर्धा परीक्षेतील विद्यार्थी या परीक्षेतील भरती प्रक्रियेविरोधात मुंबईत मंगळवारी ‘आक्रोश मोर्चा’ काढणार आहेत. महाराष्ट्र राज्य स्पर्धा परीक्षा विद्यार्थी संघर्ष समितीने या मोर्चाचं आयोजन केलं आहे.
नुकत्याच सादर झालेल्या अर्थसंकल्पात स्पर्धा परीक्षांच्या मार्गदर्शन केंद्रांसाठी प्रत्येक जिल्हा पातळीवर सरकारकडून तरतूद करण्यात आली आहे. मात्र राज्यात परिस्थिती वेगळी असल्याने आता विद्यार्थ्यांनी रस्त्यावर उतरण्याचा निर्णय घेतला आहे. या मोर्चात राज्यातील सर्व विद्यार्थी संघटना एकत्र येणार आहेत.
याआधी एमपीएससी विद्यार्थ्यांनी याच प्रकारचा मोर्चा औरंगाबादमध्ये काढला होता. औरंगाबादमधील मोर्चात हजारोंच्या संख्येत विद्यार्थी सहभागी झाले होते. त्यानंतर ८ फेब्रुवारीला पुण्यातही एमपीएससीच्या विद्यार्थ्यांनी मोर्चा काढला. मुंबईच्या या मोर्चात जवळपास १००० विद्यार्थ्यांनी सहभाग घेतला असून मुख्यमंत्र्यांची भेट होईपर्यंत आपण येथून हलणार नसल्याची प्रतिक्रिया समितीचे बाळासाहेब सानप यांनी दिली.