साहेबांच्या भाषेत सांगितलं तर तुम्हाला जास्त पटेल. त्यामुळे तुटेल इतकं ताणू नका, अशा शब्दात महाराष्ट्र नवनिर्माण सेनेच्या चित्रपट सेनेचे अध्यक्ष अमेय खोपकर चित्रपटगृह मालकांना इशारा दिला आहे. हिरकणी आणि ट्रिपल सीट या मराठी चित्रपटांना थिएटर मिळत नसल्यामुळे अमेय खोपकर यांनी चित्रपटगृह मालकांना पत्र लिहून तंबी दिली आहे.
प्रसाद ओक दिग्दर्शित हिरकणी हा चित्रपट २४ ऑक्टोबरला आणि ट्रिपल सीट २५ ऑक्टोबरला प्रदर्शित होत आहे. तर २६ ऑक्टोबरला हाऊसफुल ४ प्रदर्शित होणार आहे. हाऊसफुल ४ मुळे हिरकणी आणि ट्रिपल सीटला थिएटर मिळत नाहीत. त्यामुळे मनसेने मंगळवारीच हिरकणी चित्रपटाला थिएटर दिले नाही तर काचा फुटतील, असा इशारा दिला होता.
'हिरकणी' व 'ट्रिपल सीट' ह्या मराठी चित्रपटांना चित्रपटगृहात हक्काच्या वेळा, स्थान मिळणार नसेल तर...
— MNS Adhikrut (@mnsadhikrut) 23 October 2019
"आपण आपले चित्रपटगृह महाराष्ट्राच्या भूमीत चालवता ह्याचा आपल्याला विसर पडला असावा..." मनसे उपाध्यक्ष @MNSAmeyaKhopkar ह्यांचं चित्रपटगृह मालकांना स्मरणपत्र.#मनसेदणका pic.twitter.com/E6bIFBHkAr
अमेय खोपकर यांनी बुधवारी चित्रपटगृह मालकांना पत्र लिहून इशारा दिला आहे. या पत्रात खोपकर यांनी म्हटलं आहे की, हिरकणी आणि ट्रिपल सीट प्रदर्शित करण्यासाठी निर्मात्यांचा अथक प्रयत्न चालू आहे. पण चित्रपटगृह उपलब्ध नाही असे ठोकळेबाज उत्तर प्रत्येक ठिकाणी मिळत आहे. पण मग बाकी निर्मात्यांनी काय करायचे? कुठे जायचे? ही अशी मोनोपोली जर हिंदी निर्माते करणार असतील तर मराठी निर्मात्यांनी काय करायचे?
येणाऱ्या सर्व चित्रपटांना संधी देणं हे तुमचं कर्तव्य आहे. तुमची चित्रपटगृहे हिंदीची बटीक नाहीत. तुम्ही म्हणाल की हा आमचा प्रश्न आहे. आम्ही जे हवे ते करु…मग नीट ऐका. महाराष्ट्राची अस्मिता जपणे आणि मराठी चित्रपटांना त्यांचे हक्क मिळवून देणे हा आमचा प्रश्न आहे आणि तो सोडवण्यासाठी आम्ही जे हवे ते करु. आम्ही समंजस आहोत, सहनशील आहोत म्हणजे दुर्बल आहोत याचा असा गैरसमज तुम्ही करुन घेतला असेल तर तो चुकीचा आहे.
साहेबांच्या भाषेत सांगितले तर तुम्हाला जास्त पटेल. स्वत: जगा आणि दुसऱ्याला जगू द्या. त्यात दोघांचेही हित आहे. आणि या दोन्ही भाषा तुम्हाला समजत नसतील तर मग आम्हाला आमच्या खास भाषेत तुम्हाला समजवावं लागेल. तेव्हा तुटेल तेवढे ताणू नका, असं अमेय खोपकर यांनी सांगितलं आहे.
हेही वाचा -
हिरकणीला थिएटर न मिळाल्यास खळ्ळखट्टयाक, मनसेचा इशारा
Share
Tweet
