आपण केलेल्या कामाची पावती एखाद्या पुरस्काराच्या स्वरूपात मिळावी असं प्रत्येक कलाकाराला वाटत असतं, पण जर एखाद्याला एकाच दिवशी दोन पुरस्कारांनी सन्मानित केलं गेलं, तर त्याचा आनंदाला पारावारच उरणार नाही. अभिनेत्री प्रीतम कागणेच्या बाबतीत असंच काहीसं घडलं आहे.
प्रीतमनं एकाच दिवशी दोन वेगवेगळ्या पुरस्कार सोहळ्यांमध्ये बाजी मारत दोन पुरस्कार आपल्या नावे केले आहेत. कारकिर्दीच्या सुरुवातीच्या काळात स्वत:ला सिद्ध करण्यासाठी मेहनत घेणाऱ्या प्रीतमसाठी हा दुर्मिळ योगायोगच म्हणावा लागेल. दिग्दर्शक शिवाजी लोटन पाटील यांच्या बहुचर्चित ‘हलाल’ या चित्रपटासोबतच प्रीतमनं यापूर्वी ‘३१ ऑक्टोबर’, ‘संघर्षयात्रा’ या चित्रपटांमध्ये अभिनय केला आहे. आता ‘अहिल्या’ या चित्रपटातील भूमिकेसाठी प्रीतमला दादासाहेब फाळके आश्वासक अभिनेत्री पुरस्कार आणि संस्कृती कलादर्पणचा लक्षवेधी अभिनेत्री असे दोन पुरस्कार एकाच दिवशी प्रदान करण्यात आले आहेत.
हा आनंद शब्दांमध्ये व्यक्त करण्यासारखा नसल्याचं सांगत प्रीतम म्हणाली की, एकाच दिवशी दोन पुरस्कार मिळणे ही माझ्यासाठी खरंच अविश्वसनीय आणि अत्यंत आनंददायी बाब आहे. असा योग वारंवार जुळून येत नाही. या चित्रपटासाठी घेतलेल्या मेहनतीचं चीज या पुरस्कारांनी केलं आहे. आता चित्रपट प्रदर्शित झाल्यावर प्रेक्षकही त्यांच्या प्रतिसादातून खरा पुरस्कार देतील अशी खात्री प्रीतमला वाटते.
हेही वाचा -
सयाजीसोबत नवोदित पूजाचा 'तांडव'
मराठीसाठी पंजाबी गुरबिंदर सिंगची उर्दू कव्वाली !
Share
Tweet
