एमएमआरडीए प्रकल्पाच्या भूमिपूजनाचा धूमधडाका

मुंबई - मुंबई महानगरपालिका निवडणुकीच्या पार्श्वभूमीवर पायाभूत सुविधा प्रकल्पाचं उद् घाटन आणि भूमिपूजन करत मुंबईकरांना आकर्षित करण्याचा धडाका भाजप-शिवसेनेनं सुरू केलाय. त्यातही पंतप्रधान नरेंद्र मोदी यांच्या हस्ते अधिकाधिक प्रकल्पाच्या भूमिपूजनाचा घाट भाजप-शिवसेनेनं घातला आहे. त्यामुळे शिवस्मारक आणि मेट्रो प्रकल्पाबरोबरच आता शिवडी-न्हावा-शेवा सागरी मार्ग (मुंबई ट्रान्स हार्बर लिंक), कलानगर जंक्शन उड्डाणपुल आणि कुर्ला-वाकोला उन्नत मार्गाचंही भूमिपूजन पंतप्रधानांच्या हस्ते उरकण्यात येणार असल्याची माहिती एमएमआरडीएकडून देण्यात आली आहे.
शनिवारी, 24 डिसेंबरला 3 वाजता बीकेसीतील एमएमआरडीए मैदानावर या चारही प्रकल्पांचे भूमिपूजन पंतप्रधान करणार आहेत. मेट्रो-2ब, मेट्रो-4 आणि मुंबई-नवी मुंबईला थेट जोडत मुंबई-नवी मुंबई अंतर कमी करणारा एमटीएचल प्रकल्प मुंबईच्या विकासाच्या दृष्टीने महत्त्वाचा प्रकल्प आहे. तर कलानगर जंक्शन उड्डाणपुल आणि कुर्ला-वाकोला उन्नत मार्ग हे बीकेसीतील वाहतूककोंडी दूर करण्यासाठी हाती घेण्यात आलेले प्रकल्प आहेत. त्यामुळे अशा महत्त्वाकांक्षी प्रकल्पांचे भूमिपूजन पंतप्रधानांच्या हस्ते करत मतदारांना आकर्षित करण्याचंच सरकारचे प्रयत्न असल्याची चर्चा आहे.