महाराष्ट्रातील राज्यसभेच्या सहा रिक्त जागांसाठी 27 फेब्रुवारी 2024 रोजी निवडणूक होणार असून अर्ज करण्याची शेवटची तारीख 15 फेब्रुवारी 2024 आहे. भारत निवडणूक आयोगाने  महाराष्ट्रासह 16 राज्यांमध्ये रिक्त होणाऱ्या राज्यसभेच्या एकूण 56 जागांसाठी निवडणूक वेळापत्रक जाहीर केले.

महाराष्ट्रातील या खासदारांचा कार्यकाळ संपणार

महाराष्ट्रातील राज्यसभा खासदार श्री अनिल देसाई, प्रकाश जावडेकर, कुमार केतकर, व्ही. मुरलीधरन, नारायण राणे आणि श्रीमती वंदना चव्हाण यांचा कार्यकाळ 02 एप्रिल 2024 रोजी संपल्याने राज्यातून सहा राज्यसभेच्या जागा रिक्त होत आहेत. या जागांसह इतर राज्यांतील एकूण 56 राज्यसभेच्या जागांसाठी 27 फेब्रुवारी रोजी निवडणूक होणार असून त्याच दिवशी निकालही जाहीर होणार आहेत.

निवडणूक आयोगाने जाहीर केलेल्या जागांमध्ये आंध्र प्रदेश (3), बिहार (6), छत्तीसगड (1), गुजरात (4), हरियाणा (1), हिमाचल प्रदेश (1), कर्नाटक (4), मध्य प्रदेश (5) यांचा समावेश आहे. महाराष्ट्र (6), तेलंगणा (3), उत्तर प्रदेश (10), उत्तराखंड (1), पश्चिम बंगाल (5), ओडिशा (3) आणि राजस्थान (3) या 56 जागांवर निवडणूक होणार आहे.

या निवडणुकांची निवडणूक अधिसूचना ८ फेब्रुवारी रोजी जारी करण्यात येणार आहे. अर्ज करण्याची अंतिम तारीख 15 फेब्रुवारी असून अर्जांची छाननी 16 फेब्रुवारीला होईल. 20 फेब्रुवारीपर्यंत अर्ज मागे घेता येणार आहेत. 27 फेब्रुवारी रोजी सकाळी 9 ते दुपारी 4 या वेळेत मतदान होणार आहे. सायंकाळी 5 वाजता निकाल जाहीर होणार आहेत. 29 फेब्रुवारी 2024 रोजी संपूर्ण निवडणूक प्रक्रिया संपेल.

हेही वाचा

राज्यसभेच्या 6 जागांसाठी निवडणूक जाहीर

भारतीय रेल्वेमध्ये 'मराठी तरुण-तरुणींना' संधी, राज ठाकरेंची मोठी पोस्ट