ठाण्याच्या झैद अहमदने माजी विश्वविजेत्या योगेश परदेशीला २५ ११, २५-११ असे सरळ दोन सेटमध्ये पराभूत करून सर्वानाच आश्चर्यचकित केले अाणि दुसऱ्या राज्य मानांकन कॅरम स्पर्धेचे विजेतेपद पटकावले. या वर्षी तीन वेळा अंतिम फेरीत मजल मारत झैद अहमदने पहिल्यावहिल्या राज्य विजेतेपदाला गवसणी घातली.
मुलुंड जिमखाना अायोजित दुसऱ्या राज्य मानांकन कॅरम स्पर्धेत उपांत्य लढतीमध्ये झैदने पुण्याच्या गणेश तावरेचे अाव्हान २५-८, ८-२५, २५-० असे परतवून लावले होते. योगेश परदेशीने मुंबईच्या जितेंद्र काळेला २५-११, १६-१४, २५-२४ असे पराभूत केले होते.
महिला गटातील अंतिम सामन्यात मुंबईच्या काजल कुमारीने मुंबईच्याच आयेशा मोहम्मद हिचा २२-१८, ०-२५, २५-८ असा तीन सेटमध्ये फडशा पाडला. पहिला सेट आयेशाने गमाविल्यानंतर दुसऱ्या सेटमध्ये तिने काजलला भोपळाही फोडू दिला नव्हता. परंतु आपल्या आक्रमक खेळाच्या जोरावर काजलने तिसरा सेट जिंकला.
हेही वाचा -
Share
Tweet
