कुर्ला ते सायन स्थानकांदरम्यान असलेला पादचारी पूल तोडण्यात येणार असल्याने हार्बर आणि मध्य रेल्वे मार्गावर विशेष ब्लॉक घेतला जाणार आहे. हार्बरच्या अप-डाऊन या दोन्ही मार्गांवर आणि मध्य रेल्वेच्या अप जलद मार्गावर शनिवारी रात्री ११.३० ते रविवारी पहाटे ५.३० पर्यंत ब्लॉक घेतला जाईल. तर मध्य रेल्वेच्या डाऊन जलद आणि अप-डाऊन धीम्या मार्गावर रात्री १.३० ते पहाटे ३.३० पर्यंत ब्लॉक घेतला जाईल.
यादरम्यान हार्बर आणि मध्य रेल्वेवरील लोकल आणि मेल एक्स्प्रेसचं वेळापत्रक कोलमडणार असल्याने प्रवाशांची मोठी गैरसोय होणार आहे.
मध्य रेल्वेवरील कुर्ला ते सायन स्थानकांदरम्यान असलेला पूल जुना झाला आहे. या पुलाचं बांधकाम अतिशय जीर्ण झाले आहे. त्यामुळे हा पूल पाडण्याचा निर्णय घेण्यात आला आहे.
नरेंद्र पाटील, जनसंपर्क अधिकारी, मध्य रेल्वे
ब्लॉकदरम्यान हार्बरच्या वडाळा ते मानखुर्द या मार्गावरील वाहतूक पूर्णपणे बंद असेल. यादरम्यान पनवेल ते मानखुर्द मार्गावर विशेष गाड्या चालवल्या जातील. तर हार्बरवरील प्रवासी ट्रान्स हार्बरवरून ठाणे ते वाशी, नेरुळपर्यंत प्रवास करू शकतील.
याचसोबत मुंबईत येणाऱ्या काही मेल-एक्स्प्रेस गाड्या उशिरा धावण्याची शक्यता आहे.