अभिनेत्री दीया मिर्झा आई झाली आहे. तिनं मुलाला जन्म दिला आहे. ही बातमी स्वतः दीयाने सोशल मीडियाच्या माध्यमातून आपल्या चाहत्यांना दिली आहे. मात्र तिची प्रीमॅच्युअर डिलिव्हरी झाली असून अद्याप तिचं बाळ आयसीयूत आहे.
दीयानं सांगितल्यानुसार, तिनं १४ मे २०२१ रोजी मुलाला जन्म दिला. ठराविक वेळेच्या दोन महिन्याआधी तिच्या बाळाचा जन्म झाला आहे. अव्यान आझाद रेखी असं तिच्या बाळाचं नाव आहे.
दीयानं सोशल मीडियावर आपल्या मुलाच्या जन्माशी संबंधित एक पोस्ट शेअर केली आहे. दीयानं सांगितल्यानुसार, तिचा मुलगा अव्यान हा प्रीमॅच्युअर बाळ आहे. जन्मापासून ते नियोनॅटल आईसीयूमध्ये दाखल आहे.
दियानं सांगितले की, गर्भधारणेत काही कॉम्प्लिकेशन आल्यानं आणि बॅक्टेरियल संसर्गामुळे बाळाचा जीव धोक्यात होता. त्यामुळे डॉक्टरांनी तत्काळ सी-सेक्शनद्वारे प्रसुती करण्याचा सल्ला दिला.
मुलगा अव्यानला आता घरी घेऊन जाण्यास दीया आणि तिचे कुटुंबीय आतुर आहेत. दीयानं पुढे लिहिलं की, त्याची बहीण समायरा आणि आजीआजोबा बाळाला आपल्या कुशीत घेण्यास खूप आतूर झाले आहेत.
दीयानं यावर्षी १५ फेब्रुवारी रोजी वैभव रेखी या बिझनेसमनसोबत लग्न केलं होतं. लग्नात दोघांचेही नातेवाईक आणि जवळचे मित्र उपस्थित होते. दीया आणि वैभव दोघांचंही हे दुसरे लग्न आहे.
दीयाचे पहिले लग्न बिझनेसमन साहिल संघासोबत झाले होते. ऑक्टोबर २०१४ मध्ये दोघांनी दिल्लीत आर्य-समाजात अगदी साध्या पद्धतीनं लग्न केलं होतं. दीया आणि साहिल लग्नापूर्वी ६ वर्षे रिलेशनशिपमध्ये होते. मात्र २०१९ मध्ये दोघांनी घटस्फोट घेतला होता.
दीया प्रमाणेच वैभवचंही पहिलं लग्न झालं होतं. आणि पहिल्या लग्नापासून त्याला एक मुलगी असून समायरा हे तिचं नाव आहे. योगा आणि लाइफस्टाइल कोच सुनैना रेखीसोबत वैभवचं पहिलं लग्न झालं होतं. मात्र लग्नाच्या काही वर्षांतच दोघे विभक्त झाले. वैभव हा एक प्रसिद्ध व्यावसायिक असून मुंबईतील पाली हिल परिसरात राहतो.
लग्नाच्या दीड महिन्यानंतर हनीमूनसाठी मालदीवमध्ये गेलेल्या दीयानं प्रेग्नेंसीबद्दल खुलासा केला होता. यावेळी तिनं बेबी बंपसोबतचे फोटोदेखील शेअर केले होते.
दीयानं 2000 मध्ये मिस इंडिया एशिया पॅसिफिकचा किताब आपल्या नावी केला होता. त्यानंतर तिनं 'रहना है तेरे दिल में' या चित्रपटाद्वारे आपल्या करिअरची सुरुवात केली. दीया शेवटची तापसी पन्नू स्टारर 'थप्पड'मध्ये झळकली होती. चित्रपटाचे दिग्दर्शक अनुभव सिन्हा होते. यापूर्वी दीयानंही 2019 मध्ये डिजिटल डेब्यू केला होता. 'काफिर' या वेब शोमध्ये तिनं कनाझ अख्तरची भूमिका साकारली होती.
हेही वाचा
Share
Tweet
