मुंबईच्या छत्रपती शिवाजी महाराज आंतरराष्ट्रीय विमानतळावरील टर्मिनल-1च्या पुनर्विकासाच्या पार्श्वभूमीवर विमानसेवांमध्ये मोठे फेरबदल करण्यात येणार आहेत. त्यामुळे मुंबईकरांच्या प्रवासाचा वेळ आणि खर्च वाढण्याची शक्यता आहे.

1 ऑक्टोबरपासून आंतरराष्ट्रीय विमानांच्या सुमारे 30 टक्के हालचाली नवी मुंबई आंतरराष्ट्रीय विमानतळाकडे वळवल्या जाण्याची शक्यता आहे. तर 25 ऑक्टोबरपासून टर्मिनल-1वरून सुरू असलेल्या सुमारे एक-तृतीयांश विमानसेवा टर्मिनल-2वर हलवल्या जाणार आहेत.

टर्मिनल-1च्या प्रस्तावित पुनर्विकासासाठी हे फेरबदल करण्यात येत आहेत. विमानतळ प्रशासनाने नागरी विमान वाहतूक मंत्रालयाला दिलेल्या माहितीनुसार, टर्मिनल-1Bच्या उत्तरेकडील भागाचे पाडकाम 15 जानेवारी 2027 पासून सुरू करण्याचे नियोजन आहे.

दरम्यान, एअर इंडिया एक्स्प्रेस, इंडिगो आणि अकासा एअर यांसारख्या विमान कंपन्यांनी काही सेवा आधीच नवी मुंबई विमानतळाकडे हलवण्यास सुरुवात केली आहे. दिल्ली, बंगळुरू आणि कोचीसारख्या शहरांसाठीच्या काही सकाळच्या विमानसेवांवर याचा परिणाम झाला आहे.

या बदलामुळे विशेषतः मुंबईच्या पूर्व आणि पश्चिम उपनगरांमधील प्रवाशांची चिंता वाढली आहे. नवी मुंबई विमानतळ अनेक मुंबईकरांसाठी तुलनेने दूर असल्याने विमानतळापर्यंत पोहोचण्यासाठी अधिक वेळ आणि अतिरिक्त प्रवास खर्च होण्याची शक्यता आहे.

नव्या विमानतळासाठी सार्वजनिक वाहतुकीचे पर्याय मर्यादित असल्याचीही प्रवाशांची तक्रार आहे. त्यामुळे अनेकांना खासगी टॅक्सीवर अवलंबून राहावे लागू शकते. आगामी सणासुदीच्या काळात विमान प्रवाशांची संख्या वाढण्याची शक्यता असल्याने हा बदल आणखी गैरसोयीचा ठरण्याची शक्यता आहे.

पर्यटन क्षेत्रातील प्रतिनिधींनीही चिंता व्यक्त केली असून, कोचीसारख्या पर्यटनस्थळांसाठीच्या विमानसेवांमध्ये होणाऱ्या बदलाचा पर्यटन मागणीवर परिणाम होऊ शकतो, असे त्यांचे म्हणणे आहे.

दरम्यान, टर्मिनल-1च्या पुनर्विकासादरम्यान प्रवाशांना कमीत कमी त्रास व्हावा, यासाठीच विमानसेवांचे फेरवाटप केले जात असल्याचे विमानतळ प्रशासनाने स्पष्ट केले आहे. विमान कंपन्या आणि संबंधित यंत्रणांमध्ये समन्वय साधण्यासाठी स्वतंत्र ट्रान्झिशन ग्रुप तयार करण्याचाही प्रस्ताव आहे.

त्यामुळे 1 ऑक्टोबर आणि 25 ऑक्टोबरनंतर विमान प्रवासाचे नियोजन करणाऱ्या प्रवाशांनी तिकीट बुक केल्यानंतर आपले विमान नेमके कोणत्या विमानतळावरून आणि कोणत्या टर्मिनलवरून सुटणार आहे, हे विमान कंपनीकडून नक्की तपासावे.

हेही वाचा

गणेशमूर्ती घेऊन मेट्रोतून प्रवास करता येणार