मुंबईत हनुमान जयंती (Hanuman Jayanti) निमित्त 2 एप्रिल 2026 रोजी होणाऱ्या उत्सव आणि मिरवणुकांच्या पार्श्वभूमीवर वाहतूक पोलिसांनी वाहतूक निर्बंध आणि पर्यायी मार्ग सुचवले आहेत. 

पश्चिम उपनगरात वाकोला येथील हनुमान मंदिरातून सुमारे 8 ते 10 हजार भाविकांची भव्य मिरवणूक निघणार आहे. ही मिरवणूक वाकोला जंक्शन, नेहरू रोड, गोलिबार रोड, अब्दुल हकीम चौक आणि खार सबवे मार्गे जाणार आहे.

विशेषतः गोलिबार रोडवरील अरुंद रस्ता आणि सुरू असलेल्या कामांमुळे या भागात मोठ्या प्रमाणावर वाहतूक कोंडी होण्याची शक्यता व्यक्त करण्यात आली आहे.

त्यामुळे 2 एप्रिल रोजी सायंकाळी 6 ते रात्री 12 वाजेपर्यंत वाकोला जंक्शन ते सांताक्रूझ (पूर्व) रेल्वे स्थानक ते खार सबवे हा मार्ग सर्व वाहनांसाठी बंद ठेवण्यात येणार आहे. नेहरू रोड आणि गोलिबार रोडवर वाहतूक मोठ्या प्रमाणावर प्रभावित होणार आहे. वाहनचालकांनी खार सबवे टाळण्याचा सल्ला देण्यात आला आहे.

पर्यायी मार्ग म्हणून मिलन सबवे आणि मिलन फ्लायओव्हरचा वापर करण्याचे आवाहन करण्यात आले आहे. वाहतूक नियंत्रणासाठी ठिकठिकाणी पोलिस तैनात असतील.

दरम्यान, पूर्व उपनगरात साकीनाका ट्रॅफिक विभागाअंतर्गत मारुती मंदिर परिसरातही निर्बंध लागू करण्यात आले आहेत. जेव्हीएलआर सर्व्हिस रोड (दक्षिणेकडे) वरील आदिशंकराचार्य मार्गावर, लक्ष्मी हॉटेलजवळ मोठी गर्दी अपेक्षित असल्याने येथे वाहनांना (आपत्कालीन सेवांव्यतिरिक्त) प्रवेश बंद करण्यात येणार आहे.

हे निर्बंध 1 एप्रिल रात्री 9 वाजल्यापासून 2 एप्रिल सकाळी 10 वाजेपर्यंत लागू असतील. या काळात या मार्गावर पार्किंगलाही बंदी असेल.

वाहनांना मुख्य जोगेश्वरी-विक्रोळी लिंक रोड (JVLR) दक्षिण मार्गावर वळवण्यात येणार आहे. वाहतूक पोलिसांनी नागरिकांना प्रवासाचे नियोजन आधीच करण्याचे, पर्यायी मार्गांचा वापर करण्याचे आणि प्रशासनाला सहकार्य करण्याचे आवाहन केले आहे, जेणेकरून उत्सवादरम्यान कोणतीही अडचण निर्माण होणार नाही.

हेही वाचा

कामा हॉस्पीटलमध्ये 1 एप्रिलपासून जेनेटिक काउन्सेलिंग विभाग सुरू