शिवसेना (UBT) खासदार प्रियंका चतुर्वेदी (Priyanka Chaturvedi) यांनी मुलुंड येथील मेट्रो लाईन 4 च्या कामादरम्यान झालेल्या जीवघेण्या स्लॅब दुर्घटनेनंतरही संबंधित कन्सोर्टियमची सेवा कायम ठेवल्याबद्दल Mumbai Metropolitan Region Development Authority वर तीव्र टीका केली आहे.

सोशल मीडियावर प्रतिक्रिया देताना त्यांनी “ही लाजिरवाणी बाब आहे” असे म्हटले आहे. जीवितहानी होऊनही जबाबदारांवर कारवाई होत नसल्याचा आरोप केला. “लोक मरतात, स्लॅब कोसळतात, निकृष्ट दर्जाचे काम होते, तरीही कुणावर जबाबदारी निश्चित केली जात नाही,” असे त्यांनी नमूद करत ही चांगल्या प्रशासनाची व्याख्या आहे का, असा सवाल उपस्थित केला.

मुलुंडमधील एलबीएस रोडवर 14 फेब्रुवारी रोजी सुरू असलेल्या मेट्रो कामादरम्यान पॅरापेट वॉलचा स्लॅब खाली कोसळून एका व्यक्तीचा मृत्यू झाला होता. तर तिघे जखमी झाले होते. या घटनेनंतर सुरक्षेच्या मुद्द्यांवर मोठा संताप व्यक्त करण्यात आला होता.

डॉइचे बान इंजिनिअरिंग अँड कन्सल्टिंग, हिल इंटरनॅशनल आणि लुईस बर्जर ग्रुप यांच्या समावेश असलेले DB Hill–LBG कन्सोर्टियम 2018 पासून मेट्रो लाईन 4 साठी जनरल कन्सल्टंट म्हणून कार्यरत आहे. प्रकल्पातील बांधकाम गुणवत्ता, सुरक्षा नियमांचे पालन आणि अंमलबजावणी यावर देखरेख ठेवण्याची जबाबदारी त्यांच्यावर आहे.

या दुर्घटनेनंतर MMRDAने कन्सोर्टियमवर 1 कोटी रुपयांचा दंड ठोठावला होता. तसेच उपमुख्यमंत्री Eknath Shinde यांच्या अध्यक्षतेखाली झालेल्या बैठकीत कन्सोर्टियमची नियुक्ती रद्द करण्याचा इशाराही देण्यात आला होता. मात्र, आता MMRDAने आपला निर्णय बदलत कन्सोर्टियमला प्रकल्पावर कायम ठेवले आहे.

अधिकाऱ्यांच्या माहितीनुसार, आधीची कारवाई “गैरसमज” असल्याचे सांगत कन्सोर्टियमला हटवण्याऐवजी सुधारणा उपाययोजना राबवण्यावर भर देण्यात आला आहे. मोठ्या मेट्रो प्रकल्पांसाठी उपलब्ध सल्लागारांची संख्या मर्यादित असल्यामुळे त्यांना हटवल्यास भविष्यातील प्रकल्पांवर परिणाम होऊ शकतो, असेही कारण दिले जात आहे.

दरम्यान, MMRDAने कन्सोर्टियमसोबत अनेक बैठक घेतल्या असून प्रकल्पातील वरिष्ठ पातळीवरील बदलांसह सुधारणा करण्याचे आश्वासन देण्यात आल्याचेही अधिकाऱ्यांनी सांगितले आहे.

हेही वाचा

आता BMC सभांचे लाईव्ह स्ट्रिमिंग होणार