गेले वर्षभर मुंबई विद्यापीठात सुरू असलेला ऑनलाईन तपासणी आणि परीक्षांचा निकाल हा गोंधळ कुणासाठीही नवीन नाही. मात्र या गोंधळानंतरही यावर्षी मुंबई विद्यापीठात प्रवेश घेणाऱ्या विद्यार्थ्यांच्या संख्येत वाढ झाली आहे.
शैक्षणिक वर्ष २०१७-१८ मध्ये मुंबई विद्यापीठ आणि संलग्नित महाविद्यालयात विविध पारंपरिक, व्यावसायिक, नाविन्यपूर्ण आणि कौशल्यावर आधारित अभ्यासक्रमांसाठी २ लाख ६० हजार ७४६ विद्यार्थ्यांनी प्रवेश घेतला आहे. मागील शैक्षणिक वर्ष २०१६-१७ मध्ये २ लाख ३७ हजार २३० विद्यार्थ्यांनी पदवीपूर्व अभ्यासक्रमांसाठी प्रवेश घेतला होता. यावर्षी विविध अभ्यासक्रमांच्या प्रवेशात मोठी वाढ झाली असल्याची माहिती विद्यापीठाने दिली आहे.
| शैक्षणिक वर्ष | प्रवेश |
|---|---|
| २००९-१० | २ लाख ४७६ |
| २०१०-११ | २ लाख ३ हजार ४८३ |
| २०११-१२ | २ लाख २ हजार ६३७ |
| २०१२-१३ | १ लाख ९७ हजार ७७० |
| २०१३-१४ | २ लाख ३ हजार ६२९ |
| २०१४-१५ | २ लाख ३३ हजार ९७९ |
| २०१५-१६ | २ लाख ३४ हजार २३० |
| २०१६-१७ | २ लाख ३७ हजार ६६१ |
मुंबई विद्यापीठामार्फत पदवीपूर्व प्रवेशासाठी विविध शाखा निहाय एकूण ३६८ अभ्यासक्रम राबवले जातात. यामध्ये कला शाखेसाठी १६५ अभ्यासक्रम, वाणिज्य (३२), विज्ञान (३९), विधी (०६), तंत्रज्ञान (११), फाईन आर्ट (२६), अॅडऑन कोर्सेस (६७), बीव्होक (०१) आणि गरवारे संस्थेमार्फत (२१) असे विविध ३६८ अभ्यासक्रम राबवले जात असल्याची माहिती मुंबई विद्यापीठाने दिली.
यंदाच्या प्रवेशांत झालेली वाढ हे विद्यार्थ्यांमध्ये मुंबई विद्यापीठाविषयी असलेल्या विश्वासाचं प्रतीक आहे. गेल्या १६१ वर्षांत मुंबई विद्यापीठाने ज्या आत्मविश्वासानं विद्यार्थ्यांची जबाबदारी आपल्या खांद्यावर पेलली आहे त्याचंच हे फळ आहे.
देवानंद शिंदे, कुलगुरू, मुंबई विद्यापीठ
हेही वाचा
एम कॉमच्या विद्यार्थ्यांचं नुकसान नाही, विद्यापीठाचं आश्वासन
Share
Tweet
