मुंबई महापालिकेनं लसीकरणाबाबत महत्वाचा निर्णय घेतला आहे. कोविन-ॲप’ नोंदणी आणि प्राप्त ‘अपॉइंटमेंट स्लॉट’ यानुसारच लसीकरण करण्यात येणार आहे. त्यामुळे नोंदणी नसलेल्यांनी गर्दी न करण्याचं आवाहन मुंबई महापालिकेकडून करण्यात आलंय.
बृहन्मुंबई महापालिका क्षेत्रात १ मे पासून १८ वर्षांवरील नागरिकांचं लसीकरण करण्यात येत आहे. मात्र यानंतर अनेक ठिकाणी लसीकरणासाठी नागरिक गर्दी करीत आहे. ही बाब लक्षात घेऊन गर्दी टाळण्याच्या दृष्टीनं आणि नागरिकांना सुलभतेनं लसीकरण करता यावं, या उद्देशानं हे पाऊल उचलंल आहे.
‘कोविन-ॲप' नोंदणी व प्राप्त 'अपॉइंटमेंट स्लॉट' यानुसारच लसीकरण
— माझी Mumbai, आपली BMC (@mybmc) May 6, 2021
लसीकरण केंद्रांवर गर्दी केल्यास सामाजिक दुरीकरणाची अंमलबजावणी कठीण; त्यामुळे गर्दी न करण्याचे नागरिकांना आवाहन
आवश्यक त्या बाबींची पडताळणी केल्यानंतरच लसीकरण केंद्रांवर प्रवेश देण्याचे महापालिका आयुक्तांचे निर्देश. pic.twitter.com/GnK8AStVwC
आता केवळ ‘कोवीन ॲप’ किंवा ‘कोविन पोर्टल’ यावर यशस्वीरित्या नोंदणी झाल्यावर ‘अपॉइंटमेंट स्लॉट’ मिळालेल्या व्यक्तींचेच लसीकरण करण्याचा निर्णय महानगरपालिका प्रशासनानं घेतला आहे. यानुसार सर्व लसीकरण केंद्रांवर संबंधित बाबींची पडताळणी केल्यानंतरच नागरिकांना लसीकरण केंद्रात प्रवेश द्यावा, असे आदेश आज सर्व संबंधितांना देण्यात आले आहेत.
४५ पेक्षा अधिक वय असणाऱ्या ज्या व्यक्तींना कोव्हॅक्सिन लशीचा दुसरा डोस घ्यावयाचा आहे, अशा व्यक्तींनी त्यांच्या पहिल्या लसीकरणाचे प्रमाणपत्र हे ‘हार्ड कॉपी’ किंवा ‘सॉफ्ट कॉपी’ स्वरूपात सादर करावी. त्यानंतर लसीकरण केंद्राच्या व्यवस्थापकांनी सदर बाबींची योग्य ती पडताळणी केल्यानंतर लसीकरण केंद्रात प्रवेश देण्यात येईल.
हेही वाचा