निवडणूक आयोगाकडून (Election Commission )आज उद्धव ठाकरे (Uddhav Balasaheb Thackeray) गटाला 'शिवसेना उद्धव बाळासाहेब ठाकरे' हे नाव तर मशाल हे चिन्ह मिळालं आहे. तर शिंदे गटाला बाळासाहेबांची शिवसेना हे नाव मिळालं आहे.

निवडणूक आयोगाच्या निर्णयानंतर मुख्यमंत्री एकनाथ शिंदे यांनी पहिली प्रतिक्रिया दिली आहे. वंदनीय हिंदुहृदयसम्राट शिवसेनाप्रमुख बाळासाहेब ठाकरे यांच्या प्रखर हिंदुत्ववादी विचारांचा अखेर विजय. आम्हीच बाळासाहेबांच्या विचारांचे वारसदार आहोत, असं शिंदे यांनी ट्वीट करत म्हटलं आहे.

मुख्यमंत्री एकनाथ शिंदे यांनी माध्यमांशी बोलताना म्हटलं की, आम्ही दिलेली चिन्ह रद्द केली असली तरी मंगळवारी सकाळी आम्हाला एक चिन्ह मिळेल. बाळासाहेबांच्या विचारांची शिवसेना म्हणून आम्ही भूमिका घेतली होती. आज निवडणूक आयोगाने आम्हाला 'बाळासाहेबांची शिवसेना' म्हणून पक्षाच्या नावाला मान्यता दिली आहे, असं शिंदे म्हणाले.

दोन्ही गटांच्या नावातील दुसरा पर्याय केंद्रीय निवडणूक आयोगाने मान्य केले आहेत. उद्धव ठाकरे यांच्या गटाला 'शिवसेना उद्धव बाळासाहेब ठाकरे' हे नाव देण्यात आलं आहे. तर त्यांना 'मशाल' हे चिन्ह देण्यात आलं आहे. तसेच शिंदे गटाला 'बाळासाहेबांची शिवसेना' हे नाव देण्यात आलं आहे.

उद्धव ठाकरे यांनी त्रिशूल या चिन्हाची मागणी केली होती. हे धार्मिक चिन्ह असल्याने हे देता येत नाही. तसेच उगवता सूर्य हे तामिळनाडूतील पक्षाचं चिन्ह असल्याने हे चिन्ह देता येणार नाही असं निवडणूक आयोगाने स्पष्ट केलं. त्यामुळे तिसरा पर्याय म्हणून मशाल हे चिन्ह देण्यात आलं आहे.

हेही वाचा

ठाकरे गटाची 'मशाल' पेटणार! निवडणूक आयोगाकडून 'या' नावाला मंजूरी

ढाल-तलवार, इंजिन ते धनुष्यबाण, 'असा' आहे शिवसेनेच्या निवडणूक चिन्हाचा प्रवास