महाराष्ट्र विधिमंडळाचे अर्थसंकल्पीय अधिवेशन आजपासून सुरू होत आहे. केंद्रीय निवडणूक आयोगाने शिंदे यांना शिवसेना पक्षाचे नाव आणि धनुष्यबाण वापरण्याची परवानगी दिली आहे. त्यानंतर आता भरत गोगावले यांनी शिवसेनेच्या ५५ आमदारांना ‘व्हीप’ जारी केला आहे.
अर्थसंकल्पीय अधिवेशन सुरू होण्यापूर्वी मुख्यमंत्री एकनाथ शिंदे यांच्या 'वर्षा' बंगल्यावर 40 आमदारांची बैठक झाली. यामध्ये अर्थसंकल्पीय धोरणावर चर्चा करण्यात आली. या बैठकीत व्हीप जारी करण्याचा निर्णयही घेण्यात आला.
ठाकरे गटाच्या दाव्यानुसार शिंदे गट वेगळा गट असल्याने त्यांना व्हीप जारी करता येणार नाही. मात्र विधानसभेचे अध्यक्ष राहुल नार्वेकर हेही शिवसेनेला पक्ष म्हणून ओळखत असल्याचं सांगत आहेत, कारण शिवसेनेत दोन गट असल्याचं त्यांना कुठलंही पत्र आलेलं नाही.
दरम्यान, भरत गोगावले यांनीही अधिवेशनासाठी हजेरी व्हीपचे उल्लंघन करणाऱ्यांवर कारवाई केली जाणार नाही, असे स्पष्ट केले आहे.
व्हीप हा पक्षाचा आदेश आहे. या आदेशाचे पालन न केल्यास संबंधित आमदाराचे सदस्यत्व रद्द करण्याची विनंती पक्षाच्या वतीने पीठासीन अधिकाऱ्यांना करण्यात आली आहे. त्यामुळे शिंदे गटातील 40 आणि ठाकरे गटातील 15 असे एकूण 55 आमदार या अधिवेशनात कसे सहभागी होतात, यावर पुढील अनेक घडामोडी अवलंबून आहेत.
आजपासून सुरू होणाऱ्या विधानसभेच्या अधिवेशनात राज्याचा अर्थसंकल्पही ९ मार्चला सादर होणार आहे.