Mutual Fund भाग २ : 'हे' आहेत म्युच्युअल फंडाचे १० फायदे

गुंतवणुकीसाठी म्युच्युअल फंड (Mutual Fund)का आवश्यक आहेत याची माहिती आपण मागील लेखात घेतली. या लेखात म्युच्युअल फंडाचे फायदे काय आहेत हे जाणून घेणार आहोत.

SHARE

गुंतवणुकीच्या इतर योजनांपेक्षा दिर्घ मुदतीत चांगला परतावा हवा असेल तर म्युच्युअल फंडात गुंतवणूक करणं अपरिहार्य आहे. गुंतवणुकीसाठी म्युच्युअल फंड (Mutual Fund)का आवश्यक आहेत याची माहिती आपण मागील लेखात घेतली. या लेखात म्युच्युअल फंडाचे फायदे काय आहेत हे जाणून घेणार आहोत.


१) अनेक योजना

गुंतवणुकदारांच्या विविध गरजांना डोळ्यासमोर ठेवून म्युच्युअल फंड (Mutual Fund) योजना तयार केल्या आहेत. भारतात ४४ म्युच्युअल फंड कंपन्यांच्या शेकडो योजना आहेत. गुंतवणूकदारांच्या अल्प, मध्यम, दीर्घ कालावधीतील गरजा लक्षात घेऊन म्युच्युअल फंड योजना तयार करण्यात आल्या आहेत. त्यामुळे गुंतवणुकदारांना हव्या त्या योजना निवडता येतातइक्विटी फंड (Equity Fund), डेट फंड (Debt Fund), हायब्रिड फंड (Hybrid Fund), गोल्ड फंड (Gold Fund), सेक्टर फंड (Sector Fund), ईएलएसएस फंड (ELSS) या श्रेणींमध्ये म्युच्युअल फंड योजना तयार केल्या गेल्या आहेत. त्यामुळे गुंतवणूकदारांना आपल्या गरजेनुसार आवश्यक योजनांमध्ये गुंतवणूक करता येते. उदा. कर बचत करण्यासाठी गुंतवणूकदारांना ईएलएसएस फंड निवडता येतील.


२) तज्ज्ञांचं मार्गदर्शन

गुंतवणुकादारांनी गुंतवलेल्या निधीचं योग्य व्यवस्थापन करण्यासाठी प्रत्येक म्युच्युअल फंड हाउस फंड व्यवस्थापक (मॅनेजर) नेमते. या फंड व्यवस्थापकाला सहाय्य करण्यासाठी मोठी रिसर्च टीम आणि व्यावसायिक तज्ञ असतातया रिसर्च टीमचं आर्थिक बाजारपेठेवर कायम लक्ष असतं. ते विविध क्षेत्र आणि कंपन्यांमधील सध्याचे आणि आगामी काळातील ट्रेंड्स याचं बारकाईनं संशोधन करत असतात. याचा अहवाल ते फंड व्यवस्थापकला देतात. फंड मॅनेजर या अहवालाचा तुलनात्मक अभ्यास करून गुंतवणुकीचा निर्णय घेतात. फंड मॅनेजरची गुंतवणुकीवर नियमीत नजर असते. गुंतवणुकीचे वेळोवेळी पुनरावलोकनही केलं जातं. गुंतवणूकदारांना योजनेतून जास्तीत जास्त परतावा मिळवून देणे हे फंड मॅनेजरचं उद्दिष्ट आहे. या तज्ञांमुळे गुंतवणुकदारांना योग्य निर्णय घेता येतो. त्यामुळे म्युच्युअल फंडाचे नियमित गुंतवणूकदार दीर्घ मुदतीत मोठा लाभ मिळवत असल्याचं आपल्याला दिसून येतं.


३) कमी जोखीम

म्युच्युअल फंड गुंतवणूकदाराला वेगवेगळ्या योजनांमध्ये गुंतवणुकीच्या संधी मिळतात. त्यामुळे एखाद्या योजनेची कामगिरी कमी असेल तर दुसऱ्या योजनेच्या चांगल्या कामगिरीचा फायदा घेता येतो. म्हणजे एका योजनेतील तोटा दुसऱ्या योजनेतून भरून निघू शकतो. त्यामुळे जोखीम कमी राहते. म्युच्युअल फंड कंपनी गुंतवणुकदारांची गुंतवणूक वेगवेगळ्या कंपन्यांच्या शेअर्समध्ये गुंतवते. म्हणजे तुम्ही कितीही रक्कम गुंतवा. त्यातील थोडी - थोडी रक्कम अनेक कंपन्यांच्या शेअर्समध्ये गुंतवली जाते. वर पाहिल्याप्रमाणे फंड मॅनेजर या गुंतवणुकीचे वारंवार पुनरावलोकन करतो.


४) कमी खर्च

म्युच्युअल फंड योजनांमध्ये तुमच्याबरोबर लाखो गुंतवणूकदार गुंतवणूक करत असतात. त्यामुळे तुमचा गुंतवणुकीचा खर्च तुलनात्मकदृष्ट्या कमी येतो. जर तुम्ही एकट्याने गुंतवणूक केली असती तर खर्च अधिक झाला असता. त्यामुळे शेअर बाजारात थेट गुंतवणुकीपेक्षा फंडातील गुंतवणुकीस कमी खर्च येतो.


५)१०० रुपयांपासूनही गुंतवणूक 

म्युच्युअल फंडामध्ये तुम्ही एसआयपीद्वारे दर महिन्याला अगदी कमीत कमीत १०० रुपयांपासूनही गुंतवणूक करू शकता. काही योजनांमध्ये एसआयपीची किमान रक्कम ५०० रुपये तर काही योजनांमध्ये १०० रुपये आहे. भविष्यातील योजनांचा विचार करून गुंतवणूकदार म्युच्युअल फंडात गुंतवणूक करू शकतो. घर खरेदी, वाहन खरेदी, सेवानिवृत्तीनंतरची तरतूद आदी उद्दिष्ठ्ये पूर्ण करण्यासाठी ही गुंतवणूक फायदेशीर ठरते


६) कर बचत 

म्युच्युअल फंडांच्या कर बचतीसाठी अनेक योजना आहेत. ईएलएसएस आणि इक्विटी लिंक्ड सेविंग्स स्कीममध्ये गुंतवणूक करून गुंतवणुकादारांना कर बचत करता येते. ईएलएसएस योजनांचा  लॉक-इन पिरीयड ३ वर्षांचा आहे. म्हणजे या योजनेतून तुम्हाला ३ वर्ष पैसे काढता येणार नाहीत. ईएलएसएसमधील गुंतवणुकीवर दरवर्षी दीड लाख रुपयांची कर सवलत मिळते.


७) पारदर्शकता

म्युच्युअल फंडातील गुंतवणुकीचं मूल्य रोज माहिती करून घेता येते. म्हणजे तुमच्या योजनेचा आज किती एनएव्ही आहे हे तुम्हाला रोज संध्याकाळी समजते. प्रत्येक महिन्याच्या शेवटी सर्व म्युच्युअल फंड कंपन्या त्यांच्या योजनांच्या सद्य स्थितीचा अहवाल प्रकाशित करते. यामधून तुम्ही केलेल्या फंड योजनेची गुंतवणूक कोणकोणत्या कंपन्यांच्या शेअर्समध्ये केली आहे हे समजते. इतर ठिकाणी केलेल्या गुंतवणुकाही समजतात.


८) सेबी, अॅम्फीचं नियंत्रण

Security & Exchange Board of India (सेबी) आणि Association of Mutual Funds of India (AMFI) कडे सर्व म्युच्युअल फंडांची नोंदणी केलेली असते. गुंतवणुकादारांच्या हिताचं संरक्षण करण्यासाठी म्युच्युअल फंड कंपन्यांवर सेबी आणि अॅम्फीचं बारीक लक्ष असतं. गुंतवणुकदाराने तक्रार केल्यास सेबी आणि अॅम्फीकडून त्या कंपनीवर कडक कारवाई केली जाते. सेबी सर्व म्युच्युअल फंडांच्या कार्याची तपासणी करते. म्युच्युअल फंड कंपन्यांना आपल्या योजनांचा कार्य अहवाल नियमीतपणे प्रकाशित करणं बंधनकारक आहे.


९) सहज प्रवेश 

म्युच्युअल फंड योजनांमध्ये गुंतवणूक करणं खूप सोपं आहेम्युच्युअल फंड वितरक, दलाल तसंच थेट त्या म्युच्युअल फंड कंपनीकडून योजनेत गुंतवणूक करता येते. आॅनलाइन तसंच आॅफलाइन गुंतवणूक करू शकतो. म्युच्युअल फंडात कुठुनही, कोणत्याही वेळी, सहजपणे आॅनलाइन गुंतवणूक करता येते. कम्प्युटर, लॅपटाॅप आणि मोबाइलवरूनही गुंतवणूकदार गुंतवणूक करू शकतो.


१०) कधीही पैसे काढता येतात

गुंतवणुकदाराला गरजेच्या वेळी सहजपणे पैसा काढण्याची सुविधा मिळते. म्युच्युअल फंडांच्या ओपन एंडेड योजनांमध्ये कधीही गुंतवणूक सुरू करता येते. तसंच कधीही पैसे काढताही येतात. पैसे काढण्याची आॅर्डर नोंदवल्यानंतर २ दिवसात तुमच्या बँक खात्यात पैसे जमा होतात. क्लोज एंडेड योजनेत केलेली गुंतवणूक काढण्यावर मात्र काही निर्बंध असतात.



हेही वाचा -

गुंतवणुकीसाठी म्युच्युअल फंडच का? जाणून घेऊया म्युच्युअल फंडाविषयी




संबंधित विषय
ताज्या बातम्या