सध्या कॅशलेसचा जमाना आहे. शॉपिंग सेंटर्स, सिनेमा, हॉटेल सगळीकडंच डेबिट, क्रेडिट कार्डांचा वापर होत असल्यानं आपलं कार्ड सुरक्षित हातात तर आहे ना? आपल्या कार्डाचं क्लोनिंग तर होत नाही ना? याची दक्षता घेण्याच्या सूचना क्रेडिट कार्ड टर्मिनल उत्पादक कंपनी ‘इन्जेनिको’नं दिल्या आहेत. एवढ्यावरच न थांबता बनावट कार्ड स्वाईप मशीन ओळखायची कशी? त्याच्या टीप्सही दिल्या आहेत. या टीप्स डेबिट, क्रेडिट कार्डाचा वापर करणाऱ्या सगळ्यांसाठी खूप महत्त्वाच्या ठरू शकतील.
हॉटेलात फॅमिली किंवा मित्रांसोबत जेवायला गेल्यावर बरेचजण बिल भरण्यासाठी डेबिट किंवा क्रेडिट कार्ड वापरतात. वेटर समोर आल्यावर त्याच्याकडं बिनधास्तपणे कार्ड सोपवून गप्पा मारण्यात रंगून जातात. ही बेफिकरी बँक ग्राहकांसाठी आता धोक्याची ठरू लागलीय. काही दिवसांपूर्वी अंधेरी आणि वांद्र्यातील फाईव्हस्टार हॉटेलातील वेटर्सच्या टोळीनं ग्राहकांच्या डेबिट, क्रेडीट कार्डाचं क्लोनिंग करून त्यांच्या अकाऊंटमधून लाखो रुपये काढून घेतले होते. या प्रकरणी पोलीस तपास सुरूच आहे.
टेक्लॉनॉजी बरीच अडव्हांस झाल्यानं कार्डातून बँक ग्राहकाचा डेटा चोरणं आता खूपच सहज, सोपं झालं आहे. त्यासाठी हे अॅडव्हांस चोर ‘स्किमर मशीन’चा वापर करतात. ही मशीन हुबेहुब कार्ड स्वाईप मशीन सारखीच दिसते. या मशीनमध्ये कार्ड टाकताच, बँक ग्राहकाचा सगळा डेटा स्किमर मशीनमध्ये सेव्ह होतो. त्यानंतर हा डेटा काढून तो बँक ग्राहकाच्या बनावट कार्डात टाकला जातो. मग काय, हे चोरटे कुठल्याही बँकेच्या एटीएममध्ये जाऊन खात्यातील सगळे पैसे काढून घेतात किंवा कार्डाचा वापर करून वस्तू खरेदी करतात.
चोरांनी आपल्या डेबिट, क्रेडिट कार्डाचा गैरवापर करू नये म्हणून काळजी घ्यायलाच हवी. खासकरून स्वाईप मशीनमध्ये पिन नंबर टाकताना सावधगिरी बाळगायला हवी. कार्ड कुणाकडेही सोपवू नये, संशयास्पद हालचालींवर नजर ठेवावी आणि सर्वात महत्त्वाचे म्हणजे आपल्या खात्यातून परस्पर पैसे काढल्याचं कळल्यावर त्वरीत बँकेशी संपर्क साधावा, जेणेकरून चोराचा ठावठिकाणा काढणं सोपं जाईल.
- रश्मी करंदीकर, प्रवक्त्या, मुंबई पोलीस
डाऊनलोड करा Mumbai live APP आणि रहा अपडेट
मुंबईशी संबंधित प्रत्येक बातमी आणि अपडेट मिळवण्यासाठी Mumbai live च्या फेसबुक पेजला लाईक करा
(खाली दिलेल्या कमेंट बॉक्समध्ये तुमच्या प्रतिक्रिया अवश्य द्या)
Share
Tweet
